“Hapni sytë se nuk është ashtu si thotë media e blerë”, Ish-ministri: Asnjë detyrë nuk kemi kryer!

Ish-ministri Ylli Manjani ndalet tek informacionet dhe lajmet që u serviren shqiptarëve përkundrejt realitetit.

Ai ironikisht thotë se nëse shumë gjëra që qeveria ka thënë në televizor do të ishin bere realitet, sot do te ishin hapur negociatat. Ai fton qytetarët të mos helmohen më, por te jenë vigjilentë.

Sipas Manjanit, nuk kemi kryer asnjë detyrë dhe lajmet nga mediat e blera duhet të mos ndiqen sipas ish-ministrit dhe per te mjafton vetëm të hapim sytë.

REAGIMI I MANJANIT

Shqiptarët në shumicë që shohin lajmet dhe emisionet politike në TV kryesore, e dinë vendin e tyre bahçe me lule.

Çuditen se si ka mundësi që shtetet kryesore të BE janë të pakënaqura me Shqipërinë!

Lasgushi po fluturon fort, sa nga Rinasi e sa në aeroportin e Korçës. Linjat e tjera ajrore si Austrian apo Alitalia ulen në Kukës.

Qesharakë, por të frikshëm!

I kanë helmuar njerëzit rëndë me rrena nga më të çuditshmet. Ka disa njerëz që kur kalojnë në Llogara, desh aksidentohen duke u përpjekur të gjejnë ku po bëhet tuneli.

Shumë të tjerë e dinë që në Peshkopi shkohet shumë shpejt nga rruga e Arbrit, që u bë për 3 vjet ajo që s’u bë për 30…

Shumë shqiptarë e dinë se mbyllja e gjykatave është gjë e mirë për demokracinë. Ka disa prej tyre që e dinë se gjykatat i mbylli opozita. Madje ca më shumë akoma e dinë se negociatat i pengon Luli. Ky ju ka thënë gjermanëve, francezëve dhe holandezëve bllokojini…

I helmuan, i mbytën fare me rrena!

Pastaj kur dalin dokumentarë e lajme nga media të huaja del rrena sheshit.

Aty del se sa drogë e krim eksportohet nga ne. Aty del se vendi është zhytur në varfëri totale dhe se njerëzit e pa shpresë ikin masivisht!!!

Derisa na e thonë troç udhëheqësit e Europës që “skemi bërë asgjë për të merituar as që të bisedojmë me ju”. Madje “kemi bërë gabim që ju kemi dhënë dhe të drejtën për të lëvizur pa viza”…

Ç’duhet më për të kuptuar se në çfarë mashtrimi kolektiv jetojmë?!

Këshilla ime si fillim është: refuzoni të informoheni nga mediat kryesore në vend! Mos u helmoni më me ta!

Hapni sytë o njerëz, shihni vetë rreth e rrotull ku banoni për të kuptuar se nuk është hiç ashtu siç thotë media e blerë. As ashtu siç thonë bedelët që Europa ka hallet e veta se ne i kemi kryer të gjitha detyrat tona.

Asnjë detyrë nuk kemi kryer! Asnjë për be!

K.B/DRONI.al

/DRONI.al/