Policia e Durrësit ka reaguar në lidhje me një ngjarje të publikuar mbrëmjen e djeshme në rrjetet sociale, ku përmes një videoje tregohej sesi një i ri përplasej në tokë nga policia e cila i vuri prangat.
Drejtoria vendore e policisë së Durrësit ka sqaruar se personi në fjalë, i identifikuar me inicialet S.M ka kundërshtuar forcat e policisë në momentin e kontrollit të kërkuar nga efektivët. Sipas policia, në momentin e shoqërimit me forcë policia i ka kryer dhe testin e alkoolit dhe ka rezultuar se i riu ishte në gjendje të dehur në makinë. Së bashku me të është shoqëruar dhe pasagjeri.
Drejtoria Vendore e Policisë Durrës.
Në lidhje me një video të publikuar në rrjetet sociale ku paraqitet një shtetas, i cili është shoqëruar nga shërbimet e Komisariatit të Policisë Durrës, ju sqarojmë se:
Shërbimet e Policisë, në zbatim të detyrave funksionale kanë ndaluar shtetasin S.M., për të kryer verifikim të dokumentacionit të mjetit.
Shtetasi i mësipërm nuk i është bindur urdhërit të punonjësve të policisë për të treguar dokumentacionin e mjetit, por i ka kundërshtuar në mënyrë të vazhdueshme.
Edhe pasagjeri në mjet, shtetasi R.T., ka kundërshtuar punonjësit e policisë për t’i ardhur në ndihmë drejtuesit të mjetit me qëllim që drejtuesi i mjetit të mos kryente testin e alkoolit dhe të shmangte verifikimin e dokumentacionit të mjetit.
Në vijim të dy shtetasit janë shoqëruar forcërisht në ambientet e Komisariatit të Policisë, pa ushtruar në asnjë moment dhunë fizike ndaj tyre.
Drejtuesit të mjetit i është bërë testi i alkoolit nga punonjësit e qarkullimit rrugor dhe u konstatua se drejtonte mjetin nën ndikimin e alkoolit 0.38 mg/l.
Konform procedurave ligjore shtetasi S.M., (drejtuesi i mjetit) është proceduar për veprën penale “Mosbindja ndaj urdhërit të punonjësit të policisë së rendit publik”, si dhe i është pezulluar leja e drejtimit.
Gjithashtu edhe shtetasi R.T., (pasagjer në mjet) është proceduar për veprën penale “Mosbindja ndaj urdhërit të punonjësit të policisë së rendit publik “.
Policia e Durrësit është e angazhuar në zbatim të ligjit me qëllim, parandalimin dhe goditjen e paligjshmërisë për të krijuar një ambient shoqëror sa më të sigurtë dhe fton cilindo që konstaton abuzim me detyrën nga ana e punonjësve të policisë që të telefonojë në numrin 112, apo në numrin 0800 90 90 , si dhe të dërgojë imazhe në Komisariatin Dixhital, duke ju garantuar anonimat të plotë dhe një reagim të shpejtë e të paanshëm.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
