Është goditur sot nga policia greke një grup që trafikonte drogë nga Shqipëria drejt shtetit helen.
Grupi kriminal në fjalë transportonte marijuanë përmes kufirit të gjelbër mes dy vendeve, e dërgonte fillimisht në qytetin-port të Igumenicës e më pas drejt Athinës që ishte edhe destinacioni final i lëndës narkotike.
Gjatë operacionit janë arrestuar 21 shtetas shqiptarë dhe grekë, ndërsa janë sekuestruar 142.5 kg marijuanë, 3.3 kg kokainë, 1 pistoletë dhe 16,756 euro.
Të njëjtit grup, më herët i janë sekuestruar 140 kg marijuanë, 650 gr kokainë dhe 400 gr heroinë, ndërsa prej shtatorit 2018 ky grup ka trafikuar rreth 500 kg marijuanë, 6 kg kokainë dhe 1 kg heroinë.
Prej fillimit të vitit, policia greke ka sekuestruar plot 840 kg marijuanë ardhur nga Shqipëria.
