Edi Rama në Londër si një fantazmë

Kryetari i PD, Lulzim Basha, dhjetor 2017, gjeti kohën të mbante një takim të hapur me përfaqësues të komunitetit shqiptarë në Londër, demokratë, socialistë, pa dallim bindjesh politike ku ju përgjigj pyetjeve të të gjithë të interesuarve për më shumë se 3 orë e gjysmë. Ishte kënaqësi të shikoje edhe kryeministrin e Kosovës Ramush Haradinaj të takonte qytetarët nga Shqipëria dhe Kosova

 Nga Av. Naim Hasani *

Kemi mësuar nga mediat në Shqipëri së Kryeministri Edi Rama ishte për një vizitë në Londër në një takim vjetor të Bankës Europiane për Rindërtim dhe Zhvillim (BERZH). Bashkë me të ishin të ftuar edhe kryeministrat e vendeve të Ballkanit perëndimor. Në pamje të parë duket mjaft normale. Por duke menduar rrethanat e vizitës, nuk mund të anashkalosh se si ka mundësi që një kryeministër as që do të ia dijë se në Britani jeton një komunitet prej ndoshta 100.000 shqiptarësh, një pjesë e të cilëve kanë lënë Shqipërinë, për të ju larguar vuajtjeve, mjerimit dhe pasigurisë që ka mbjellë qeverisja e tij dhe Rilindja që ka vdekur me kohë.

Pas takimeve që ai dhe kryeministrat e tjerë zhvilluan në selinë e BERZH, ishte kënaqësi të shikojë si kryeministri i Kosovës takonte qytetarët e thjeshtë nga Shqipëria dhe Kosova, në një takim të hapur në një Pub shumë të njohur në Kilburn të Londrës, në pronësi të babait të këngëtares së njohur shqiptare Rita Ora. Zoti Rama ndoshta kishte shumë frikë se në çfarëdo takimi që do të mbante me shqiptarët, do të ndeshej me protestë ballore ku do ta shihte me sytë e tij se Tahiri dhe krimi, varfërimi, rrënimi, largimi i shqiptarëve, falsiteti i Rilindjes do t’i numëroheshin një e nga një dhe këtë ai nuk do kishte mundësi ta censuronte dhe nuk do mund as të blinte asnjë shqiptar që të prezantonte një realitet falso sikur të gjithë e duan, ashtu siç bën rëndom në Shqipëri.

Ishte ironike të shikosh se si e prezantoi veten zoti Rama edhe në Londër si një shpëtimtar i shqiptarëve kudo që janë, kur në të vërtetë nuk ka as edhe një gjë pozitive të thotë se çfarë ka bërë për qytetarët e vet në Shqipëri. Në Londër jetojnë shumë intelektualë të cilët z. Rama mund t’i përbuze sepse ndoshta nuk do ndjehej i qetë po t’i takonte, por edhe shqiptarët që jetojnë në Britani janë qytetarë të atij vendi dhe ai dhe qeveria shqiptare kanë detyrim moral dhe ligjor që të paktën ndoshta edhe njëherë të vetme, të kthejnë sytë nga ata edhe pse shteti dhe qeveria Britanike ju ka ofruar atyre të gjitha çfarë qeveria dhe shteti shqiptar as që duan dhe as që munden të ua japin.

Arroganca e kryeministrit shqiptar nuk njeh kufi dhe shumë shqiptarë të Britanisë nuk duan dhe nuk mund të pajtohen me politikat e një kryeministri dhe qeverie që nuk ka as respektin më të vogël për qytetarët që jetojnë jashtë kufijve të Shqipërisë dhe që varfëron dhe shkatërron çdo ditë ata që jetojnë në territorin e Shqipërisë.

Çfarë kontrasti ky me takimin qe mbajti Kryeministri i Republikës se Kosovës Ramush Haradinaj. Nuk ka se si ndryshim të mos ketë edhe më kryetarin e Partisë Demokratike të Shqipërisë. Gjatë një vizite mjaft të shkurtër që pati në Londër në datë 14 dhjetor 2017, kryetari i PD dhe lideri i opozitës shqiptare  Lulzim Basha, gjeti kohën të mbante një takim të hapur me përfaqësues të komunitetit shqiptarë në Londër, socialistë e demokratë, pa dallim bindjesh politike ku ju përgjigj pyetjeve të të gjithë të interesuarve për më shumë se tre orë e gjysmë. Kjo tregon më së miri orientimin Europian të kreut të PDSH, liderit të opozitës shqiptare Lulzim Basha dhe nxjerr në pah mësë qarti, arrogancën dhe injorimin që u bën shqiptarëve kryeministri aktual z.Rama. Shqiptarët nuk mund të presin të ecin përpara me një qeveri që si orientim ka krimin dhe shkatërrimin e emrit dhe dinjitetit te shqiptareve

* Autori është kryetari i degës së PD-së në Britani të Madhe

/DRONI.al/