Rreth 41 milionë euro është vlera e pasurive të sekuestruara nga shtatori gjatë operacionit “Vjeshtë 2017”.
Toka, apartamente, biznese dhe makina luksoze janë sekuestruar nga Policia e Shtetit brenda dy muajve. Report TV mëson se në të gjithë vendin Policia ka sekuestruar 32 mijë m2 tokë, e cila dyshohet se është blerë me para që kanë ardhur nga aktiviteti kriminal.
8 apartamente janë sekuestruar më vendim gjykate, në Vlorë dhe Tiranë. 89 apartamente dhe biznese të tjera vijojnë të jenë të bllokuara nga Policia, pasi po kryhet verifikim për to. Dyshimet janë se këto biznese e pasuri të paluajtshme janë blerë me parë që kanë ardhur nga trafikimi i drogës.
Gjithashtu 115 makina luksoze vijojnë të qëndrojnë të sekuestruara në 12 drejtoritë vendore të Policisë, pasi nuk justifikojnë me dokumente burimin e të ardhurave. Mes këtyre makinave, janë edhe 15 automjete të blinduara.
Asetet e bllokuara “Vjeshtë 2017”
32 mijë m2 tokë e sekuestruar
8 apartamente të sekuestruara me vendim gjykate
89 apartamente të bllokuara nga Policia
115 makina luksoze
41 milionë euro vlera totale e pasurive të sekuestruara
Kjo është hera e parë që një vlerë kaq e madhe pasurish të sekuestrohet brenda një afati 2-mujor.
Operacioni “Vjeshtë 2017” ka vënë nën sekuestro pasuri të dyshimta se kanë lidhje me grupet kriminale. Burimet sqarojnë se vlera e pasurive të paluajtshme dhe bizneseve që kanë grupet kriminale, dyshohet se është 10 herë më e lartë.
Për këtë qëllim po kryhen verifikime të tjera, por tashmë çdo informacion po i kalon Task-Forcës së ngritur nga Ministria e Brendshme, ku pjesë e saj është edhe eksperti i FBI-së Mark Newhouse.
Për pasuritë e tjera të cilat po verifikohen, do të jetë Task-Forca e cila do të vendos për bllokimin e pasurive ose vijimin e hetimeve. Në muajin janar pritet që Task-Forca të urdhërojë bllokimin e disa pasurive të tjera, ku përfshihen biznese të mëdha, por edhe komplekse ndërtimesh që janë ndërtuar me paratë që kanë si burim krimin.
