Vijon dita e katërt e protestës së opozitës në çadrën e ngritur përballë Kryeministrisë.
Kreu i Partisë Demokratike, Lulzim Basha, ka deklaruar se nuk ka kthim pas deri në rrëzimin e qeverisë Rama dhe krijimin e një qeverie teknike që do mundësojë zgjedhje të lira dhe të ndershme në 18 qershor.
Kreu i Forumit Rinor Demokrat, Belind Këlliçi komentoi protestën e sotme të gjimnazistëve të “Partizanit”, duke deklaruar se të rinjtë janë kundër ligjit të arsimit të lartë.
“Vendimi për qëndrimin në çadër është marrë nga qytetarët. Shqiptarët kanë të drejtë për të votuar me vullnet të lirë. Të rinjtë duan të dinë çfarë do ndodhë me ligjin për arsimin e lartë. Modeli i Bashës është ndryshe për të gjithë shqiptarët”, u shpreh Këlliçi
Deputetja demokrate, Dhurata Çupi, deklaroi se opozita nuk do të tërhiqet deri në krijimin e një qeveri teknike.
“Jemi në shtëpinë e lirisë së shqiptarëve, shumica e tyre kanë kaluar një herë në këtë çadër në këto ditë. Basha tashmë është lideri i shumicës së shqiptarëve, që do ti udhëheqë për një parlament jo fasadë, për një qeveri jo fasadë dhe për zgjedhje jo fasadë. Ky është trinomi që i mban shqiptarët në këtë shtëpi të lirisë dhe ky është trinomi që do ta mbajë opozitën në këmbë deri në zgjedhje të lira dhe qeveri teknike. Protesta do vijojë. Me këtë qeveri dhe miliona të paligjshme që qarkullojnë nuk mund të ketë zgjedhje të lira dhe të ndershme”, u shpreh Dhurata Çupi.
Protesta e opozitës para Kryeministrisë në ditën e katërt
