Detaje të reja janë zbardhur nga operacioni policor “Hijet” në Tiranë, ku rezulton se personi i marrë peng është biznesmeni i ndërtimit Florian Sula, 37 vjeç.
Policia e Tiranës finalizoi operacionin duke goditur një rast të rëndë të rrëmbimit dhe dhunës për qëllime përfitimi financiar. Në pranga janë vënë Hysen Neza, 33 vjeç dhe Kevin Neza, 25 vjeç, ndërsa një bashkëpunëtor i tyre, 28-vjeçari J. N., është shpallur në kërkim.
Sipas hetimeve, më 31 mars 2026, tre të dyshuarit e kanë marrë me forcë biznesmenin në automjet dhe e kanë mbajtur për disa orë në një ambient në Xhafzotaj, ku e kanë kanosur dhe ushtruar dhunë fizike ndaj tij për ta detyruar të jepte një shumë parash.
Ngjarja u zbulua pas kallëzimit të bërë nga vetë viktima, çka çoi në ndërhyrjen e strukturave të Hetimit të Krimeve të Rënda, në bashkëpunim me Forcën Operacionale dhe njësinë “Shqiponja”.
Gjatë operacionit u sekuestruan 5 automjete, 5 telefona celularë, një shumë parash dhe sende të tjera të kundërligjshme që dyshohet se janë përdorur në këtë aktivitet kriminal.
Policia vijon punën për kapjen e personit të tretë të përfshirë dhe për dokumentimin e plotë të rastit, ndërsa materialet i janë referuar Prokurorisë për veprime të mëtejshme.
