Ministri i Mbrojtjes, Ermal Nufi, njoftoi vendimet më të fundit të Këshillit të Ministrave, që përfshijnë autorizimin e shoqërisë “KAYO” për të negociuar dhe firmosur marrëveshje me dy kompani, me qëllim prodhimin e mjeteve lundruese dhe dronëve.
Sipas tij, këto vendime shënojnë një hap të rëndësishëm, pasi për herë të parë hapet rruga për ndërtimin e mjeteve lundruese në Shqipëri, duke krijuar ndikim pozitiv në zhvillimin industrial dhe në rritjen e punësimit.
Nufi bëri të ditur se janë miratuar dy vendime të posaçme për këtë qëllim, ndërsa në total janë aprovuar katër akte që lidhen me Ministrinë e Mbrojtjes. Dy prej tyre kanë të bëjnë drejtpërdrejt me Forcat e Armatosura dhe përfshirjen e tyre në misione ndërkombëtare ushtarake.
Ai theksoi se pjesëmarrja e trupave shqiptare në këto misione dëshmon nivelin e lartë të përgatitjes, si në aspektin ushtarak ashtu edhe në atë civil, si dhe rolin aktiv të Shqipërisë në operacionet e përbashkëta ndërkombëtare. Sipas tij, kjo eksperiencë kthehet në vend si vlerë e shtuar përmes njohurive të fituara në operacione komplekse.
I pyetur për tensionet mes SHBA-së dhe Iranit dhe mundësinë e përdorimit të bazës së Kuçovës nga SHBA, ministri u shpreh se një vendim i tillë do të varet nga zhvillimet konkrete dhe nga një kërkesë zyrtare e mundshme nga pala amerikane.
Ai nënvizoi se Shqipëria ka një marrëdhënie strategjike me Shtetet e Bashkuara të Amerikës, ndërsa theksoi se baza e Kuçovës është pjesë e strukturës së NATO-s dhe çdo vendimmarrje lidhet ngushtë me angazhimet e vendit në kuadër të aleancës.
