Policia e Shkodrës ka goditur një tjetër rast të veprimtarisë kriminale në fushën e narkotikëve, duke finalizuar pas disa javësh hetime operacionin e koduar “Kosani”.
Si rezultat i hetimeve të kryera nga Seksioni për Hetimin e Narkotikëve në Drejtorinë Vendore të Policisë Shkodër, nën drejtimin e Prokurorisë së Shkodrës, u arrestua në flagrancë shtetasi A. Sh., 41 vjeç, banues në fshatin Aliaj.
Gjatë kontrollit të ushtruar në një banesë të vjetër në pronësi të tij, shërbimet e policisë gjetën dhe sekuestruan një qese me rreth 10 kilogramë lëndë të dyshuar narkotike të llojit Cannabis Sativa, e cila u sekuestrua në cilësinë e provës materiale.
Po ashtu, policia sekuestroi edhe një automjet me targa të huaja si dhe dy motobarka, të cilat dyshohet se do të përdoreshin nga 41-vjeçari për trafikimin e lëndës narkotike.
Autoritetet bëjnë me dije se hetimet vijojnë për dokumentimin e plotë të kësaj veprimtarie kriminale dhe për identifikimin e personave të tjerë që mund të jenë të përfshirë në këtë aktivitet të paligjshëm.
Materialet procedurale i janë referuar Prokurorisë së Shkodrës për hetime të mëtejshme.a.b
