Ngarkuara me Punë e SHBA në Tiranë, Nancy VanHorn ka kërkuar nga qeveria shqiptare eliminimin e plotë të karteleve të krimit të organizuar. Ndërkaq ka theksuar edhe nevojën për marrëveshje të drejta për kompanitë amerikane që bëjnë biznes në Shqipëri.
Ambasada e Shtetet e Bashkuara të Amerikës në Shqipëri ka njoftuar se e Ngarkuara me Punë, Nancy VanHorn, ka zhvilluar gjatë kësaj jave një seri takimesh me ministrat e emëruar së fundmi në qeverinë shqiptare.
Sipas njoftimit zyrtar, VanHorn është takuar me zëvendëskryeministren Albana Koçiu, ministrin e Mbrojtjes Ermal Nufi, ministrin për Evropën dhe Punët e Jashtme Ferit Hoxha, ministrin e Energjisë dhe Infrastrukturës Enea Karakaçi, ministrin e Drejtësisë Toni Gogu, ministrin e Brendshëm Besfort Lamallari, si dhe ministren për Marrëdhëniet me Parlamentin Erjona Ismaili.
Në fokus të këtyre takimeve ka qenë forcimi i bashkëpunimit institucional dhe diskutimi i prioriteteve të përbashkëta mes dy vendeve.
Ambasada bëri me dije se gjatë këtyre takimeve VanHorn ka rikonfirmuar angazhimin e saj për bashkëpunimin me institucionet shqiptare dhe për zbatimin e prioriteteve të politikës së jashtme amerikane.
Në postimin e Ambasadës thuhet:
“Gjatë javëve të fundit, e Ngarkuara me Punë Nancy VanHorn zhvilloi takime me ministrat e emëruar së fundmi në detyra të reja; Zëvendëskryeministren Albana Koçiu, Ministrin e Mbrojtjes Ermal Nufi, Ministrin për Europën dhe Punët e Jashtme Ferit Hoxha, Ministrin e Energjisë dhe Infrastrukturës Enea Karakaçi, Ministrin e Drejtësisë Toni Gogu, Ministrin e Brendshëm Besfort Lamallari, si dhe Ministren për Marrëdhëniet me Parlamentin Erjona Ismaili.
Znj. VanHorn ritheksoi përkushtimin e Ambasadës së Shteteve të Bashkuara në zbatimin e agjendës së Shtëpisë së Bardhë të Trump: eliminimin e plotë të karteleve të krimit të organizuar, bindjen e aleatëve të NATO-s për të respektuar angazhimin e tyre të Hagës për shpenzimet në fushën e mbrojtjes dhe marrëveshje të drejta për kompanitë amerikane që bëjnë biznes në Shqipëri. Ne vazhdojmë të punojmë me partnerë në të gjitha ministritë dhe institucionet që ndajnë angazhimin tonë për dhënien e rezultateve si për amerikanët, ashtu edhe për shqiptarët.”m.k
