Policia kriminale e Tiranë ka referuar në Prokurorinë e Tiranës një material kallëzues për nisjen e ndjekjes penale ndaj një personi të dyshuar për kërcënime me jetë ndaj avokates dhe aktivistes politike Ardiana Kalaja.
Sipas raportimit të gazetarit Elton Qyno për Syri TV, kërcënimet janë bërë përmes rrjetit social Facebook nga një profil i rremë që përdor emrin “Klaus Bianconeri”.
Nga të dhënat e administruara nga policia rezulton se personi në fjalë i ka dërguar disa mesazhe kërcënuese Kalasë në aplikacionin “Messenger”. Mesazhet përmbajnë fjalë kërcënuese dhe insinuata për rrezik ndaj jetës së saj.
“…o kukull me fija! Bëj të fala Saliut dhe Sorosit. E di ti kukull me fija qi punon për mua pa vetëdijen tënde? Rama, bosi jot është kukulla ime me fija!Të kanë njoftuar kush jam unë teta? Çoj njerëz me pushime unë!Do të shkosh me pushime ti teta? Do të takosh zotin…?”.
Pas depozitimit të denoncimit dhe marrjes në pyetje të avokates Kalaja, policia ka referuar materialin në Prokurorinë e Tiranës për vijimin e hetimeve. Burime bëjnë me dije se organet ligjzbatuese do të kërkojnë informacion përmes letërporosisë nga platforma Facebook, me qëllim identifikimin e adresës IP të personit që ka dërguar mesazhet.
Materiali hetimor i referuar nga policia mban numrin 5137 dhe është administruar që prej 24 shkurtit 2026. Deri më tani, çështja nuk është caktuar ende te një prokuror për nisjen e procedurës së plotë hetimore.
Ardiana Kalaja njihet si avokate dhe aktiviste e Partia Demokratike e Shqipërisë, e cila në vite ka depozituar një sërë kallëzimesh penale dhe civile në SPAK dhe në gjykatat e vendit ndaj zyrtarëve të lartë të politikës shqiptare.
