Mazhoranca parlamentare ka rrëzuar kërkesën e Prokurorisë së Posaçme për heqjen e imunitetit të zëvendëskryeministres dhe deputetes socialiste, Belinda Balluku. Vendimi u mor me votat kundër të mazhorancës, duke bllokuar kështu vijimin e procedurave të kërkuara nga Struktura e Posaçme kundër Korrupsionit dhe Krimit të Organizuar (SPAK).
Në votimin e zhvilluar në seancën plenare, kërkesa e SPAK mori 47 vota pro, të gjitha nga radhët e opozitës, ndërsa 82 deputetë të mazhorancës votuan kundër, duke e rrëzuar përfundimisht propozimin e prokurorisë.
Seanca parlamentare u zhvillua në një atmosferë të tensionuar dhe u mbyll mes zhurmës dhe kundërshtive të forta nga deputetët e opozitës. Në shenjë proteste, ata godisnin tavolinat në sallën e Kuvendit, duke kundërshtuar vendimin e shumicës për të mos lejuar vijimin e hetimeve ndaj Ballukut.
Ndërkohë, paralelisht me zhvillimet brenda sallës, jashtë ambienteve të Parlamentit u zhvillua edhe një protestë që zgjati rreth një orë e gjysmë, ku mbështetës të opozitës shprehën pakënaqësinë ndaj vendimit të mazhorancës dhe mënyrës se si u trajtua kërkesa e prokurorisë duke kërkuar dorëheqjen e kryeministrit Edi Rama.
Gjatë seancës plenare u vu re gjithashtu mungesa e tre deputetëve të Partisë Socialiste: Elisa Spiropali, Fatmir Xhafaj dhe Blendi Gonxhja. a.b
