Janë arrestuar dy të rinjtë të cilët dyshohet se trafikonin armë zjarri nga Mali i Zi dhe i shisnin më pas në Tiranë. Ata u kapën në flagrancë teksa lëviznin me automjet në zonën e Freskut, ndërsa një i tretë është shpallur në kërkim.
Në pranga kanë rënë Donati Jaku, 31 vjeç, banues në Shkodër, dhe Florian Gjeta, 22 vjeç, banues në fshatin Domje. Sipas policisë, automjeti tip “Volkswagen” që drejtohej nga 22-vjeçari Gjeta dhe ku pasagjer ishte 31-vjeçari Jaku u ndalua për kontroll në zonën e njohur si “Rrethi i Freskut”. Gjatë kontrollit në makinë u gjetën dhe u sekuestruan 6 armë zjarri, pistoleta të markës “Sig Sauer”, të cilat dyshohet se ishin trafikuar nga Mali i Zi me qëllim shitjen, kryesisht në zonën e Freskut.
Operacioni policor u finalizua pas një hetimi dymujor të zhvilluar nga shërbimet e Policia e Shtetit, në bashkëpunim me Prokuroria e Tiranës. Aksioni u kodua “Rotondo” dhe u zhvillua nga strukturat e Komisariati i Policisë Nr. 4, në bashkëpunim me Forcën e Posaçme Operacionale të Drejtorisë Vendore të Policisë Tiranë.
Gjatë operacionit u sekuestruan 6 pistoleta “Sig Sauer”, automjeti tip “Volkswagen” me të cilin transportoheshin armët, si dhe 4 telefona celularë.
Në vijim të hetimeve është identifikuar dhe shpallur në kërkim një bashkëpunëtor i dyshuar i të arrestuarve, shtetasi me iniciale E. S. Policia bën me dije se po vijon puna për kapjen e tij, ndërsa nën drejtimin e prokurorisë po hetohet për të zbuluar edhe persona të tjerë që mund të jenë të përfshirë në këtë aktivitet kriminal. a.b
