Administrata e Kuvendit të Shqipërisë është përballur ditën e sotme me një sulm kibernetik që ka prekur sistemin e brendshëm IT të institucionit. Burime bëjnë me dije se që prej orëve të para të mëngjesit, administrata dhe deputetët nuk kanë pasur akses në kompjuterët e tyre dhe në adresat zyrtare të postës elektronike.
Problemi është konstatuar në sistemin e komunikimit elektronik të Kuvendit, ndërsa specialistët e teknologjisë së informacionit kanë nisur menjëherë verifikimet për të kuptuar shkallën e ndërhyrjes dhe dëmet e mundshme.
Ndërkohë, grupi i njohur i hakerave “Homeland Justice” ka reaguar në rrjetin social Telegram, duke pretenduar se ka arritur të depërtojë në postën elektronike të Kuvendit dhe se posedon komunikimet e deputetëve shqiptarë gjatë muajve të fundit.
Në një postim të publikuar në Telegram, grupi shkruan se ka në dorë bisedat dhe korrespondencën e anëtarëve të Kuvendit.
“Të gjitha bisedat dhe korrespondenca e anëtarëve të korruptuar të Kuvendit gjatë muajve të fundit janë në duart e Homeland Justice. Ne jemi shumë më pranë jush sesa mendoni. A i strehuat vërtet ata vrasës dhe vrasës fëmijësh? Ne do të sigurohemi që kjo turp të mbetet me ju përgjithmonë”, thuhet në mesazhin e publikuar prej tyre, duke lënë të kuptohet se mund të publikohen materiale të tjera.
Pas situatës së krijuar, mësohet se është mbledhur me urgjencë Komiteti i Sigurisë Kibernetike për të analizuar sulmin dhe për të koordinuar reagimin institucional. Autoritetet po punojnë për të verifikuar nëse ka pasur rrjedhje të të dhënave dhe sa e gjerë mund të jetë përmasa e ndërhyrjes në sistem. a.b
