Ministrja e Ekonomisë dhe Inovacionit, Delina Ibrahimaj, së bashku me ministrin e Financave, Petrit Malaj, dhe ministrin e Infrastrukturës dhe Energjisë, Enea Karakaci, zhvilluan një takim me kompanitë kryesore të sektorit të hidrokarbureve dhe drejtuesit e Shoqatës së Hidrokarbureve.
Takimi u zhvillua në kuadër të monitorimit të situatës së çmimeve të karburanteve dhe zhvillimeve të fundit në tregjet ndërkombëtare.
Gjatë diskutimit u analizua ecuria e çmimeve në bursën Platts të Mesdheut, e cila shërben si referencë për çmimet e gazoilit dhe benzinës, si dhe raporti mes çmimeve të importit, çmimeve të shitjes me shumicë dhe atyre me pakicë në tregun vendas.
Palët diskutuan për nevojën e rritjes së transparencës dhe shkëmbimit të rregullt të informacionit mbi lëvizjen e çmimeve, me synimin për të mbajtur nën kontroll situatën dhe për të garantuar një funksionim më të qëndrueshëm të tregut.
Në takim u theksua se zhvillimet e fundit në tregjet ndërkombëtare kërkojnë vëmendje të shtuar dhe reagim të shpejtë institucional, në mënyrë që të ruhet stabiliteti i tregut dhe të mbrohen interesat e konsumatorëve.
Autoritetet shtetërore do të vijojnë monitorimin e përditshëm të bursave ndërkombëtare dhe të tregut vendas të karburanteve, duke ndërhyrë në rast të devijimeve të pajustifikuara të çmimeve. Institucionet theksuan angazhimin për rritjen e transparencës, forcimin e konkurrencës së ndershme dhe mbrojtjen e interesit të konsumatorëve në tregun e hidrokarbureve në Shqipëri.
