Kryetari i Grupit Parlamentar të Partisë Demokratike, Gazment Bardhi, ka akuzuar kryeministrin Edi Rama se po mbron korrupsionin dhe po përdor shumicën parlamentare për të bllokuar drejtësinë në çështjen ndaj ish-zëvendëskryeministres Belinda Balluku.
Në një deklaratë për mediat, Bardhi tha se në Shqipëri po ndodh një “përmbysje e madhe”, ku sipas tij korrupsioni po paraqitet si viktimë, ndërsa drejtësia po shpallet fajtore. Ai iu referua debatit të fundit politik rreth kërkesës së SPAK për arrestimin e Ballukut, e cila sipas opozitës lidhet me hetimet për 11 tendera me vlerë rreth 1.1 miliardë euro.
Bardhi deklaroi se Rama, në vend që të përballej me provat e prokurorisë, zgjodhi të sulmojë drejtësinë dhe të përdorë Parlamentin për të penguar hetimet. Sipas tij, kryeministri synon të viktimizojë qeverinë dhe bashkëpunëtorët e tij, ndërsa përpiqet të diskreditojë prokurorin e çështjes dhe të minimizojë rëndësinë e provave të mbledhura nga SPAK.
“Është e pabesueshme që një kryeministër të flasë për linçim politik ndaj një partie që është vetë në pushtet. Ai flet për pavarësinë e drejtësisë, por në të njëjtën kohë voton kundër kërkesës së SPAK për arrestimin e bashkëpunëtores së tij më të afërt”, u shpreh Bardhi.
Sipas tij, vendimi për të mos lejuar arrestimin e Ballukut nuk është juridik, por politik dhe i paracaktuar që në momentin kur u ngritën akuzat. Bardhi shtoi se provat e prokurorisë përfshijnë mijëra mesazhe komunikimi ku, sipas tij, Balluku ndërhynte në procedurat e tenderave për të favorizuar kompani të caktuara.
Ai përmendi edhe rastin e tenderit për tunelin e Llogarasë, për të cilin opozita pretendon se procedura u prish që të fitonte më vonë një kompani turke që, sipas Bardhit, ishte takuar më parë me Ramën dhe Ballukun në Turqi.
Bardhi tha se refuzimi i kërkesës së SPAK nga shumica parlamentare është një precedent i rrezikshëm dhe sipas tij për herë të parë një kërkesë për hetim në nivelet më të larta të pushtetit po refuzohet mbi baza politike.
Në fund të deklaratës, ai u bëri thirrje qytetarëve të reagojnë dhe të marrin pjesë në protestën e paralajmëruar më 12 mars para Parlamentit, duke theksuar se “kur shteti merret peng nga korrupsioni, fjala u mbetet qytetarëve”.
