Mojtaba Khamenei
Asambleja e Ekspertëve në Iran ka zgjedhur Mojtaba Khamenei, djalin e Ali Khamenei, si Udhëheqësin e ardhshëm Suprem, nën presionin e Gardës Revolucionare, sipas Iran International.
Sipas Kushtetutës iraniane, kompetenca për përzgjedhjen e Liderit Suprem i takon Asamblesë së Ekspertëve, organi që në vitin 1989 emëroi vetë Khamenein pas vdekjes së Ruhollah Khomeini, udhëheqësit të Revolucionit Islamik të vitit 1979 kundër Shahut Mohammad Reza Pahlavi.
Raportimet vijnë në një klimë të tensionuar, pas pretendimeve për vrasjen e Khameneit në sulme të përbashkëta SHBA-Izrael, çka ka nxitur protesta dhe pasiguri në vend. Sipas parashikimeve kushtetuese, deri në zgjedhjen e liderit të ri, kompetencat e Udhëheqësit Suprem ushtrohen përkohësisht nga një organ treanëtarësh i përbërë nga presidenti, kreu i gjyqësorit dhe një klerik i lartë.
Presidenti iranian, Masoud Pezeshkian, e ka cilësuar hakmarrjen si “detyrë legjitime”. Nga ana tjetër, presidenti amerikan Donald Trump ka minimizuar mundësinë që opozitari në mërgim Reza Pahlavi të marrë pushtetin, duke theksuar se një figurë nga brenda Iranit do të ishte më e përshtatshme dhe duke paralajmëruar kundër një pasardhësi po aq radikal sa paraardhësi. m.k
