Ajatollah Alireza Arafi
Në një zhvillim që sinjalizon vijimësinë institucionale në Teheran, Ajatollah Alireza Arafi është emëruar anëtar i Këshillit të Përkohshëm të Udhëheqjes.
Ky organ funksionon mbi bazën e nenit 111 të Kushtetutës së Iran dhe ka kompetencën të ushtrojë detyrat e Udhëheqësit Suprem deri në një vendimmarrje nga Asambleja e Ekspertëve.
Arafi, 67 vjeç, do ta ushtrojë këtë përgjegjësi së bashku me Presidentin Masoud Pezeshkian dhe kreun e sistemit gjyqësor, Gholam-Hossein Mohseni-Ejei.
Sipas analistëve ndërkombëtarë, Arafi konsiderohet si një figurë e lidhur ngushtë me linjën ideologjike të ish-Udhëheqësit Suprem, Ali Khamenei, me të cilin ka pasur bashkëpunim të gjatë ndër vite.
Ai ka drejtuar më parë Universitetin Ndërkombëtar “Al-Mustafa”, një institucion që vendet perëndimore e kanë akuzuar për promovimin e ideologjisë shiite jashtë Iranit. Arafi njihet për qëndrime të forta kundër ndikimit perëndimor dhe për mbështetjen e bashkëpunimit të ngushtë me Rusinë dhe Kinën.
Ndërkohë, teksa Këshilli i Përkohshëm synon stabilizimin e situatës politike, në media është përfolur edhe emri i Ahmad Vahidi si një nga figurat që mund të marrë rol drejtues në strukturat elitare ushtarake. Megjithatë, mbetet ende e paqartë se kush do të zgjidhet përfundimisht si pasues i Khameneit, ndërsa vetë Arafi përmendet si një nga kandidatët potencialë.
Ministri i Jashtëm i Iranit, Abbas Araghchi në një intervistë me Al Jazeera njoftoi se ka nisur procesi për zgjedhjen e liderit të ri pas vrasjes së udhëheqësit suprem të vendit, Ali Khamenei. Ai tha se procesi kushtetues ka filluar tashmë dhe se një Këshill Tranzitor u formua në të njëjtën ditë, i cili merr përsipër përkohësisht detyrat e udhëheqjes deri në zgjedhjen e një udhëheqësi të ri suprem.
Sipas tij, Këshilli përbëhet nga presidenti i vendit, kreu i gjyqësorit dhe një avokat nga Këshilli i Rojës. Siç shpjegoi Aragchi, ky organ me tre anëtarë do të ushtrojë detyra udhëheqëse deri në përfundimin e procesit zgjedhor nga Asambleja e Ekspertëve, duke vlerësuar se zgjedhja e një udhëheqësi të ri mund të bëhet brenda një ose dy ditësh.
“Gjithçka po ecën pa probleme, në përputhje me sistemin tonë ligjor dhe Kushtetutën”, theksoi ai. r.r
