Gjyqtarë të Kushtetueses
Gjykata Kushtetuese e Shqipërisë ka shpallur vendimin lidhur me padinë e paraqitur nga gjyqtarët për çështjen e pagave të tyre, duke vendosur pranimin e pjesshëm të kërkesës.
Në vendim theksohet se ligjvënësi ka diskrecion në përcaktimin e formulës së referencës për pagat, por ushtrimi i kësaj kompetence duhet të respektojë kriteret e nenit 138 të Kushtetutës. Sipas gjykatës, parimet kushtetuese ndalojnë çdo ulje të pagës, qoftë të drejtpërdrejtë apo të fshehur.
Kushtetuesja vlerëson se formula e miratuar, e lidhur me treguesit e rritjes ekonomike, ka sjellë në praktikë një ulje të fshehur të pagave të gjyqtarëve. Për këtë arsye, Kuvendi duhet të ndërhyjë me një ligj të ri, duke përshtatur skemën e pagave në përputhje me standardet kushtetuese. Gjykata thekson gjithashtu se efektet financiare të ndryshimeve duhet të përllogariten duke nisur nga viti 2023.
Padia e gjyqtarëve lidhej me ndryshimet ligjore të miratuara në vitin 2023, kur qeveria përcaktoi që paga e tyre të ishte në masën 36% të pagës së Presidentit të Republikës. Gjyqtarët e kundërshtuan këtë formulë, duke argumentuar se ajo ka sjellë ulje të përfitimeve dhe bie ndesh me Kushtetutën. Ata kanë kërkuar një rillogaritje mbi një tjetër bazë reference, konkretisht atë të Drejtorit të Departamentit të Kryeministrisë.
Kjo është hera e dytë brenda tre viteve që gjyqtarët kërkojnë rishikim të pagave, një kërkesë që më herët është kundërshtuar nga kryeministri Edi Rama.
