Protesta në Rrjoll
Përplasjet janë rikthyer sërish në zonën e Baks-Rrjollit në Velipojë, ku banorët kundërshtojnë ndërtimin e një resorti turistik në tokat që i konsiderojnë pronë të tyre.
Në protestën e radhës, ku morën pjesë gra, fëmijë, burra dhe të moshuar, qytetarët tentuan të ndalojnë vijimin e punimeve, duke u përballur drejtpërdrejt me punonjësit dhe forcat e policisë. Sipas dëshmitarëve, efektivët kanë ndërhyrë për të zhbllokuar situatën, duke tërhequr me forcë protestuesit nga mjetet e punës, çka ka sjellë tensione dhe përplasje fizike.
Banorët u ulën në rrugë për të bllokuar automjetet dhe për të penguar hyrjen e makinerive në zonë. Me thirrje të forta si “Punëtorë ju punëtorë ne, me gjak ju me gjak ne” dhe “Do të jetë liri ose vdekje”, ata deklaruan se janë të vendosur të mos lejojnë ndërtimin e resortit. “Do të vdesim këtu për tokën tonë dhe të gjyshërve”, u shpreh një prej protestuesve.
Protesta vjen pas vendimit të Gjykatës Administrative, e cila rrëzoi kërkesën e banorëve për sigurimin e padisë, që synonte pezullimin e punimeve deri në shqyrtimin përfundimtar të çështjes. Pas tubimeve të mëparshme përpara Kuvendit dhe Prokurorisë së Posaçme, banorët janë rikthyer në terren, duke paralajmëruar përshkallëzim të reagimit nëse nuk gjejnë zgjidhje ligjore për pronat e tyre. a.b
