Eva Dumani
Pas afro 12 vitesh në kampin famëkeq Al Hawl Camp në Siri, është riatdhesuar sot në Tiranë Eva Dumani.
Eva ishte vetëm 8 vjeçe kur babai i saj e mori me vete drejt Sirisë për t’iu bashkuar xhihadistëve të Islamic State. Ajo ishte vajza e fundit shqiptare që ndodhej ende në kamp, një histori e ndjekur në vijimësi nga A2CNN.
Fillimisht, e reja u largua nga Siria drejt Turqisë me ndihmën e xhaxhait të saj. Ndërkohë, sot Ministria për Europën dhe Punët e Jashtme (MEPJ) njoftoi se operacioni për rikthimin e saj në Shqipëri është realizuar me sukses.
Në reagimin zyrtar, MEPJ thekson se operacioni i shtrirë në kohë u bë i mundur falë mbështetjes së partnerëve ndërkombëtarë, veçanërisht falë kontributit të autoriteteve turke, të cilat u falënderuan për bashkëpunimin në këtë rast sensitiv. Ministria rikonfirmoi gjithashtu gatishmërinë për t’iu përgjigjur çdo situate që prek shtetasit shqiptarë jashtë vendit.
Operacioni u realizua përmes koordinimit dhe bashkëpunimit të disa institucioneve të shtetit shqiptar, përfshirë Ministrinë për Europën dhe Punët e Jashtme. a.b
