Bardhyl Fusha
Bardhyl Fusha, personi që hyri me një armë automatike në ambientet e një banke të nivelit të dytë në Tiranë, ka deklaruar para hetuesve se prej vitesh ka ushtruar aktivitet në fushën e ndërtimit, por së fundmi ishte përballur me vështirësi të mëdha ekonomike.
“Kam qenë ndërtues, por jam zhytur në borxhe financiare dhe u detyrova të ndërmarr një veprim të tillë”, mësohet të ketë thënë ai.
Fusha u arrestua në tentativë për t’u larguar nga banka, pasi u përball me forcat e policisë, të cilat bënë të mundur neutralizimin dhe shoqërimin e tij.
Sipas deklarimeve të tij, ai kishte hapur në Tiranë disa biznese në fushën e ndërtimit, përfshirë subjektin “DBF 2012”, një aktivitet si person fizik me emrin “Bardhyl Fusha” që prej vitit 2004, si dhe një tjetër kompani të regjistruar fillimisht si “2D Construction” dhe më pas e ndryshuar në “VZ-Invest”, e regjistruar në mars 2023 në bashkëpronësi me një tjetër person.
Ai ka pretenduar se të tre këto aktivitete kanë falimentuar për shkak të borxheve, çka, sipas tij, e shtyu të tentonte grabitjen për të shlyer detyrimet ndaj kreditorëve.
Burime nga hetimi bëjnë me dije se plani ishte i paorganizuar, pasi Fusha nuk kishte marrë masa as për të fshehur identitetin, duke hyrë në bankë pa maskë.a.b
