Këlliçi me Lulgjuraj dje në SHBA.
Një përfaqësues i opozitës ka bërë të ditur se është proceduar penalisht nga Policia e Shtetit për organizimin e protestës dhe përplasjet me efektivët e rendit, ndërsa vetë ndodhej në Shtetet e Bashkuara të Amerikës.
Përmes një reagimi publik, ai deklaron se lajmin e ka mësuar teksa ndodhej në Miçigan, në Qendrën Kulturore “Nënë Tereza”, ku po zhvillonte një takim me prokurorin shqiptaro-amerikan Robert Lulgjuraj, i cili kandidon për në Kongresin e SHBA-së nën siglën e Partisë Republikane.
Sipas tij, Policia e Shtetit në Tiranë e ka marrë nën hetim për organizimin e protestës dhe “udhëheqjen e përplasjes me efektivët”, duke e cilësuar këtë veprim si të motivuar politikisht. Ai akuzon drejtuesit e policisë dhe kryeministrin Edi Rama për, siç shprehet, “targetim politik”, ndërsa thekson se ndodhet jashtë territorit shqiptar.
Në deklaratën e tij, ai paralajmëron pjesëmarrjen në protestën e paralajmëruar më 20 shkurt, duke theksuar se do të jetë “në vijën e parë” së bashku me mbështetësit e opozitës. Gjithashtu, u bën thirrje qytetarëve që të marrin pjesë në protestë, duke e cilësuar atë si një reagim kundër korrupsionit dhe kriminalitetit.
Në fund të reagimit, ai ka ftuar komunitetin shqiptar në Miçigan dhe në SHBA të mbështesë kandidaturën e Robert Lulgjurajt për në Kongresin Amerikan, duke e konsideruar këtë një mundësi historike për përfaqësim shqiptar në institucionet federale të SHBA-së. a.b
