Gjolek Gucaj
Prokuroria e Posaçme Kundër Korrupsionit dhe Krimit të Organizuar (SPAK) ka marrë të pandehur ish-kryetarin e Bashkisë Memaliaj, Gjolek Gucaj, për veprën penale të shkeljes së barazisë në tendera.
Sipas burimeve, hetimet lidhen me një procedurë prokurimi për një projekt ujësjellësi në 8 fshatra të zonës. Prokuroria dyshon për parregullsi në zhvillimin e tenderit, ndërsa pjesë e procedimit penal janë edhe shtetasit Edmonda Harizi, Bersant Ylli dhe Feta Hoxha.
Burime pranë hetimit bëjnë me dije se janë konstatuar shkelje në procedurën e prokurimit publik, çka ka çuar në ngritjen e akuzave për cenim të barazisë në tendera.
Gjolek Gucaj ka drejtuar Bashkinë e Memaliajt për disa mandate, deri në zgjedhjet vendore kur kandidati i Partisë Socialiste, Albert Malaj, fitoi me një diferencë prej 312 votash.
Ndaj ish-kryebashkiakut ka pasur edhe denoncime të mëparshme nga qytetarë, si dhe akuza politike nga Partia Demokratike, ndërsa çështja tashmë është në duart e drejtësisë për vijimin e procedurave ligjore.
