Protesta sot në Durrës, foto nga Amfora
Tensione janë regjistruar paraditen e sotme para Bashkisë së Durrësit, ku banorë të prekur nga projekti TID kanë protestuar kundër shembjes së banesave të tyre. Policia ka ndërhyrë për shpërndarjen e protestës, duke shoqëruar me forcë disa prej protestuesve.
Banorët janë mbledhur që në orët e para të mëngjesit për të kundërshtuar projektin, duke kërkuar shpjegime për fatin e pronave të tyre. Gjatë protestës, ata janë përballur fillimisht me Policinë Bashkiake dhe më pas me forcat e Policisë së Shtetit.
Sipas informacioneve paraprake, deri tani janë shoqëruar gjithsej 6 banorë. Situata u tensionua më tej pasi protestuesit bllokuan rrugën në shenjë reagimi ndaj, sipas tyre, cenimit të të drejtave dhe banesave nga projekti.
Projekti TID prek drejtpërdrejt banesat e 74 familjeve durrsake. Fillimisht, qytetarët u mblodhën para godinës së Bashkisë së Durrësit, ku kërkuan sqarime nga autoritetet vendore. Më pas ata ndoqën kryetarin e Këshillit të Qarkut, Alfred Mullaraj, si dhe ndaluan kreun e Inspektoratit të Mbrojtjes së Territorit (IMT) të Bashkisë, duke i kërkuar shpjegime për situatën.
Pasi nuk u lejuan të futeshin në ambientet e bashkisë, protestuesit hodhën vezë dhe letra higjienike në drejtim të godinës. Pas ndërhyrjes së policisë, tre prej protestuesve u shoqëruan fillimisht, ndërsa banorë të tjerë tentuan t’i nxirrnin ata nga furgoni i policisë, duke shtuar më tej tensionin në zonë.
Situata mbetet e tensionuar, ndërsa banorët paralajmërojnë vijimin e protestave nëse nuk marrin zgjidhje për çështjen e banesave të tyre. a.b
