Kryeministria
Këshilli i Ministrave ka miratuar në mbledhjen e sotme, më 6 shkurt 2026, një paketë vendimesh që parashikojnë indeksimin me 2.5% të pagave dhe elementeve përbërëse të tyre për disa kategori të administratës publike për vitin 2026.
Vendimet përfshijnë rritjen e pagës së Presidentit të Republikës, si dhe të pagës referuese bazë për funksionet gjyqësore dhe të prokurorisë. Po ashtu, është miratuar përditësimi i strukturave të pagave për Gardën e Republikës, Policinë e Burgjeve, koordinatorët kundër korrupsionit, punonjësit mbështetës, specialitetet e ndryshme në administratën publike, si edhe personelin e sistemit shëndetësor.
Krahas indeksimit, në disa sektorë parashikohen edhe rregullime specifike të shtesave dhe kompensimeve. Efektet financiare do të përballohen nga buxheti i miratuar për vitin 2026, ndërsa vendimet hyjnë në fuqi pas botimit në Fletoren Zyrtare, me efekte financiare që nga 1 janari 2026.
Projektligj për dhënie amnistie
Në mbledhjen e sotme, qeveria miratoi gjithashtu projektligjin për dhënie amnistie. Qëllimi i këtij ligji është përjashtimi, tërësisht ose pjesërisht, nga vuajtja e dënimit dhe ndjekja penale e personave që plotësojnë kriteret e përcaktuara në ligj.
Sipas projektligjit, dhënia e amnistisë udhëhiqet nga parimi i humanizmit, arritja e qëllimit të dënimit, rrezikshmëria e ulët e personave që amnistohen, edukimi dhe rehabilitimi, mbrojtja e interesit publik, si dhe dhënia e mundësisë për integrim më të lehtë dhe më të shpejtë të të dënuarve, veçanërisht të miturve dhe grave. Po ashtu, synohet rritja e eficiencës së sistemit të drejtësisë dhe mbrojtja e interesit më të lartë të fëmijës.m.k
