Gjykata e Posaçme e Apelit ka shpallur sot vendimin për ankimimin e ish-zyrtares së Policisë së Shtetit, Ervina Gjana, ish-drejtoreshë e Krimit Kibernetik, lidhur me sekuestrimin e sendeve personale në kuadër të hetimeve që SPAK po zhvillon për dosjen penale të Agjencisë Kombëtare të Shoqërisë së Informacionit (AKSHI).
Trupa gjyqësore, e kryesuar nga gjyqtari Florjan Kalaja, vendosi të pranojë pjesërisht kërkesën e paraqitur nga Gjana, duke ndaluar publikimin e të dhënave që lidhen me materialet e sekuestruara dhe që u përkasin ankimueses dhe bashkëjetuesit të saj, Renato Hristic, i dyshuar gjithashtu në këtë çështje.
Sipas vendimit, Prokuroria e Posaçme ka sekuestruar tetë aparate celularë dhe dy laptopë, të cilët konsiderohen materiale me interes për hetimin penal. Megjithatë, në vendim nuk specifikohet se cilat të dhëna konkrete nuk do të përdoren apo publikohen nga SPAK, ndërsa pranimi i ankimimit mbetet i pjesshëm.
Më herët, Gjykata e Posaçme e Shkallës së Parë kishte vendosur sekuestrimin e këtyre materialeve dhe kishte rrëzuar kërkesën e të dyshuarve për kthimin e aparateve, gjatë seancës së zhvilluar më 7 janar të këtij viti.
Telefonat dhe laptopët u sekuestruan gjatë kontrollit në banesën e Ervina Gjanës dhe të bashkëjetuesit të saj, Renato Hristic, në kuadër të hetimeve që lidhen me veprimtarinë e dyshuar kriminale të një grupi të strukturuar të lidhur me AKSHI-n.
Hetimi përfshin dyshime për mashtrime online, veprimtari call-center, ndërhyrje në sisteme informatike dhe në sistemin TIMS, si dhe bashkëpunim në krimin kibernetik, ku sipas SPAK rezulton i përfshirë edhe bashkëjetuesi i saj.
Ndërkohë, emri i Ervina Gjanës është përmendur edhe në bisedat e publikuara të Ergys Agasit, të cilat janë bërë pjesë e materialeve të referuara në kuadër të këtij hetimi.
