Përmbytjet në Durrës
Prokuroria e Durrësit ka urdhëruar sekuestrimin e dokumentacionit që lidhet me tenderin për rehabilitimin e argjinaturës së lumit Erzen, i zhvilluar nga Bashkia e Durrësit. Ky veprim vjen pas përmbytjeve të rënda që goditën zonën muajin e kaluar, duke shkaktuar dëme të konsiderueshme materiale dhe humbjen e një jete njerëzore.
Burime nga organi i akuzës bëjnë me dije se është regjistruar procedimi penal nr. 56 i vitit 2026, për veprat penale “Shpërdorim detyre”, “Shkatërrim prone nga përmbytjet” dhe “Shkatërrim prone nga pakujdesia”.
Sipas hetimeve paraprake, si pasojë e çarjes së argjinaturës së lumit Erzen u përmbytën kryesisht zonat e Katundit të Ri, Sukthit dhe Fllakës. Dëme të mëdha u shkaktuan në toka bujqësore, banesa dhe biznese, ndërsa situata u rëndua edhe më tej me humbjen e jetës së Astrit Hysenajt, 54 vjeç, punonjës pastrimi pranë Bashkisë së Durrësit. Ai u gjet i pajetë nga polumbarët në një kanal pranë ish-repartit ushtarak, pasi ishte marrë nga rrjedha e fortë e ujit.
Në vendimin e firmosur nga prokurorja e çështjes, urdhërohet sekuestrimi pranë Bashkisë së Durrësit i gjithë dokumentacionit që lidhet me procedurat e prokurimit, zbatimit dhe marrjes në dorëzim të objektit “Rehabilitim i argjinaturës, ngritjes së bankinës dhe sistemimit të argjinaturës së lumit Erzen”, si dhe i dokumentacionit tekniko-ligjor për procedurat e lejes së ndërtimit.
Paralelisht me hetimet e Prokurorisë së Durrësit, disa zyrtarë të Bashkisë së qytetit bregdetar, përfshirë edhe kryebashkiaken Emirjana Sako, janë kallëzuar në SPAK nga anëtarja e Këshillit Kombëtar të Partisë Demokratike, Ilirjana Kuçana.
Sipas kallëzimit, dyshohet se ndërhyrja në argjinaturën e lumit Erzen është kryer pa leje ndërtimi dhe pa studime të plota teknike, çka mund të ketë sjellë përmbytjen e zonave të Sukthit dhe evakuimin e banorëve.
Hetimet vijojnë për të përcaktuar përgjegjësitë konkrete institucionale dhe individuale lidhur me këtë çështje.
