Rama në bazilikën e Genazzanos
Kryeministri Edi Rama ka publikuar në rrjetet sociale pamje nga vizita e tij në Vatikan, ku shfaqet i shoqëruar nga bashkëshortja Linda Rama dhe djali i tyre, Zaho. Kreu i qeverisë bën me dije se vizita zyrtare nisi në Genazzano, në bazilikën e famshme ku ruhet shembëlltyra e Zojës së Këshillit të Mirë, e vendosur mbi një copë muri të shkëputur nga Kisha e Shkodrës në vitin 1467.
Në postimin e tij, Rama thekson rëndësinë historike dhe shpirtërore të këtij vendi për shqiptarët, duke nënvizuar se prej vitit 1467, asnjë kryetar shteti apo qeverie shqiptare nuk kishte vizituar më parë këtë bazilikë, ku krahas Zojës së Shqipërisë qëndron gjithmonë edhe flamuri kombëtar.
Kryeministri shton se bazilika e Genazzanos ka qenë një vend i shenjtë pelegrinazhi, i vizituar ndër vite nga pothuajse të gjithë Papët e Romës, ndërsa thekson se edhe Papa Leoni XVI, menjëherë pas zgjedhjes së tij, u lut pikërisht aty, pranë Zojës së Shqipërisë, e njohur edhe si Regina di Albania – Mbretëresha e Shqipërisë.
Postimi i plotë i Kryeministrit Edi Rama:
“Vizita në Vatikan për takimin me Atin e Shenjtë, nisi sot nga Genazzano, në bazilikën e famshme, ku gjendet shembëlltyra e Zojës së Këshillit të Mirë, mbi një copë të shkëputur nga muri i Kishës së Shkodrës në vitin e largët 1467.
Që nga ajo kohë asnjë kryetar shteti ose qeverie shqiptare nuk e kishte shkelur pragun e bazilikës, ku krah Zojës së Shqipërisë qëndron përherë edhe flamuri ynë kombëtar, e ku kanë kryer vizita e rite thuajse të gjithë Papët e Romës. Gjëja e parë që bëri edhe Papa Leoni XVI sapo u zgjodh, ishte vinte e të lutej në Genazzano te Zoja e Shqipërisë që thirret edhe Regina di Albania – Mbretëresha e Shqipërisë.”
