Kryeministri Edi Rama ka ashpërsuar tonet ndaj prokurorëve dhe gjykatësit, duke i akuzuar për retorikë të pavërtetë dhe hedhje balte ndaj qeverisë, në lidhje me pretendimet për përkeqësim të pozicionit të tyre financiar dhe debatet mbi pagat e magjistratëve. Gjykatësit dhe prokurorët po kërkojnë në Kushtetuese rritje page në raport me rritjen që aplikohet në administratën civile. Ndërsa Rama po ushqen këtë debat publik me synimin ndikimin e Gjxkatës Kushtetuese për një vendim negativ ndaj magjistratëve.
Gjatë deklaratës së tij, Rama mohoi kategorikisht çdo ulje të pagave, duke sfiduar publikisht përfaqësuesit e sistemit të drejtësisë që të nxjerrin qoftë edhe një dokument të vetëm që provon përkeqësimin e gjendjes së tyre financiare. Sipas tij, prokurorët dhe gjykatësit sot paguhen në nivele të krahasueshme me homologët e tyre në Greqi dhe kërkojnë rritje të tjera prej 2 mijë deri në 3 mijë euro në muaj.
“Jo vetëm që i kanë më shumë se 2 apo 3 mijë euro në muaj, por kërkojnë t’i rrisin edhe me plus 2 apo 3 mijë të tjera dhe pastaj thonë se u është përkeqësuar pozicioni financiar”, u shpreh Rama, duke i cilësuar këto pretendime si “dokrra”.
Kryeministri theksoi se qeveria që ai drejton është garantja e pavarësisë së sistemit të drejtësisë dhe se asnjëherë nuk ka ndërhyrë apo cënuar pozicionin e magjistratëve. Ai shtoi se ndryshimet e viteve të fundit kanë sjellë përmirësime të ndjeshme jo vetëm në jetën profesionale, por edhe në jetën familjare të tyre.
Në vijim, Rama u ndal edhe te neni 138 i Kushtetutës, të cilit, sipas tij, i referohen gabimisht prokurorët dhe gjykatësit. Ai sqaroi se ky nen nuk parashikon rritje progresive të pagave, por ndalon vetëm uljen e tyre dhe prekjen e të drejtave të fituara, duke theksuar se një gjë e tillë nuk ka ndodhur dhe nuk do të ndodhë kurrë.
Në fund, kryeministri u bëri thirrje magjistratëve që të reflektojnë mbi paanshmërinë e tyre dhe të fokusohen te roli kushtetues në sallën e gjyqit, duke shmangur, sipas tij, daljet publike me deklarata politike. a.b
