Mazhoranca socialiste ka zyrtarizuar kërkesën për ndryshimin e formulës së përbërjes së Komisionit të Posaçëm për Reformën Administrativo-Territoriale, duke kaluar nga ndarja aktuale 50 me 50, në një përbërje me 9 anëtarë nga mazhoranca dhe 8 nga opozita.
Kërkesa vjen pas mungesës së opozitës në mbledhjen e djeshme të komisionit, ndërkojë që po dje PD deklaroi se do të vijojë në Komision. Socialistët kanë bërë të ditur se nuk do të tërhiqen nga ky propozim, i cili pritet të shqyrtohet dhe të hidhet në votim gjatë seancës plenare të sotme në Kuvend.
Në seancë është planifikuar projektvendimi për ndryshimin e vendimit nr. 75, datë 27.10.2025, “Për ngritjen e Komisionit të Posaçëm për Reformën Administrativo-Territoriale në Republikën e Shqipërisë”, i ndryshuar. Vendimi kërkon shumicë të thjeshtë votash për miratim, në mbështetje të Kushtetutës dhe Rregullores së Kuvendit. a.b
