Berisha duke folur me gazetarët
Kreu i Partisë Demokratike, Sali Berisha, ka ashpërsuar akuzat ndaj institucioneve të drejtësisë, duke deklaruar se ka lënë një mesazh zyrtar në Prokurorinë e Posaçme (SPAK), ku denoncon atë që e cilëson si amnistim të krimit zgjedhor dhe kapje të drejtësisë nga mazhoranca.
Në deklaratën e bërë publike nga oborri i Prokurorisë së Posaçme, Berisha sulmon drejtues të SPAK-ut dhe një avokat, të cilin e përshkruan si “avokatin e Irenës me 5 mbiemra”, duke e akuzuar se ka vepruar si mercenar i “partisë-shtet”.
“Pojës së Skapit dhe avokatit të Irenës me 5 mbiemra, njeriut që amnistoi krimin zgjedhor, i rikujtoj se drejtësia vonon, por nuk harron”, thuhet në mesazhin e Berishës, i cili shton se ky denoncim duhet të mbetet në arkivën publike si dëshmi e veprimtarisë së asaj që ai e quan narko-shteti shqiptar.
Në vijim Berisha ka drejtuar akuza të rënda edhe ndaj anëtarëve të Këshillit të Lartë Gjyqësor (KLGJ), duke i cilësuar ata më kriminelë se vetë Irena me 5 mbiemra dhe skllevër të regjimit dhe të Edi Ramës.
Sipas Berishës, KLGJ-ja, me votat e Yllka Rupës, Ridvan Hados, Markelien Koçajt, Emona Muçit, Klodian Kurushit dhe kryetarit Ilir Rusi, ka refuzuar nisjen e procedurave për verifikimin dhe shpalljen e papajtueshmërisë së mandatit të Irena Gjokës, pavarësisht dokumentacionit që, sipas tij, e ndërpret automatikisht mandatin e saj.
Ai deklaron se këta anëtarë kanë shkelmuar dokumente zyrtare shqiptare dhe ndërkombëtare, duke humbur çdo ndjenjë përgjegjësie ligjore dhe profesionale. “Të mohosh vulat apostolike dhe formularët zyrtarë të shtetit do të thotë të jesh bashkautor në krim”, u shpreh Berisha.
Berisha shtoi gjithashtu se, sipas tij, Irena Gjoka ka lidhje të afërta personale dhe profesionale me figura të njohura të mazhorancës, duke e cilësuar këtë si një tjetër provë të kapjes së sistemit të drejtësisë. a.b
