Zjarret e verës
Kryeministri Edi Rama njoftoi përmes podkastit të së dielës se janë shpallur zyrtarisht dëmshpërblimet për 15 bashki të vendit të prekura nga zjarret gjatë verës së kaluar, për periudhën 15 qershor – 15 shtator.
Sipas Ramës, procesi i dëmshpërblimit po realizohet përmes Agjencisë Kombëtare të Mbrojtjes Civile dhe përfshin bashkitë Malësi e Madhe, Krujë, Rrogozhinë, Peqin, Tepelenë, Delvinë, Has, Kukës, Dibër, Kamëz, Librazhd, Gramsh, Maliq, Finiq dhe Dropull.
Kryeministri theksoi se të gjitha territoret e prekura nga zjarret kanë tashmë në dispozicion fondet e përcaktuara të dëmshpërblimit, të ndara në bazë të dëmeve të verifikuara.
“Është bërë një punë shumë e detajuar dhe është krijuar korniza e plotë ligjore dhe administrative, për të garantuar që dëmshpërblimi të shkojë aty ku duhet dhe që çdo qytetar i dëmtuar të marrë atë që i takon”, u shpreh Rama.
Sipas kreut të qeverisë, procesi synon të mbyllë përfundimisht pasojat financiare të zjarreve të verës, duke garantuar transparencë dhe shpërndarje të drejtë të fondeve publike.
