Kreu i grupit parlamentar të Partisë Demokratike, Gazment Bardhi, ka akuzuar zëvendëskryeministren Belinda Balluku se po përdor pushtetin politik për të ndikuar dhe molepsur dëshmitarë në hetimet penale në zhvillim, duke u dhënë atyre poste kyçe shtetërore. Kuvendi heziton ti heqë imunitetin ndërsa Kushtetuesja po i jep kohë.
Sipas Bardhit, një nga rastet më flagrante është këmbëngulja për emërimin e Viola Haxhiademit në krye të KESH-it, pavarësisht se ajo është person nën hetim. Ai thekson se vendosja e saj në drejtimin e një institucioni strategjik të sektorit energjetik nuk lidhet me meritën apo performancën, por me dhënien e një garancie politike për heshtje dhe bindje ndaj drejtësisë.
Një tjetër rast i përmendur nga Bardhi është tentativa për t’i dhënë Irma Drobonikut një mandat 5-vjeçar në krye të Komisionit të Prokurimeve Publike, gjithashtu person nën hetim. Sipas tij, ky institucion ka rol kyç në kontrollin e tenderëve publikë dhe emërimi afatgjatë synon të sigurojë mbrojtje politike për persona të përfshirë në afera korruptive.
Bardhi deklaron se këto veprime përbëjnë pengim të drejtpërdrejtë të drejtësisë, duke shtuar se përmes posteve dhe mandateve të forta institucionale po tentohet të ndikohen dëshmitarë dhe bashkëpunëtorë që mund të flasin përpara SPAK-ut.
Sipas opozitës, kjo strategji përbën ndërtimin e një “shteti paralel”, me qëllim bllokimin e hetimeve dhe shmangien e përgjegjësisë penale. Bardhi paralajmëron se çdo heshtje institucionale ndaj këtyre veprimeve përbën bashkëpunim me korrupsionin. a.b
