Aktori i njohur Fitim Makashi, babai i këngëtarit Redon Makashi, është ndarë nga jeta në moshën 82-vjeçare, pas një sëmundjeje të gjatë. Ai ka ndërruar jetë në spital, duke lënë pas një kontribut të çmuar në artin shqiptar.
Fitim Makashi lindi më 10 prill 1944 në Gjirokastër. Në vitin 1963 nisi studimet për aktrim në Institutin e Lartë të Arteve në Tiranë, të cilat i përfundoi në vitin 1967. Pas diplomimit, ai u angazhua për një periudhë të gjatë si pedagog në Institutin e Lartë të Arteve, ndërsa paralelisht interpretoi edhe në skenën e Teatrit Popullor, sot Teatri Kombëtar.
Në vitin 1978, Makashi u emërua zyrtarisht aktor i Teatrit Popullor, ku zhvilloi një karrierë të qëndrueshme për rreth 12 vite, deri në mesin e viteve ’90. Gjatë kësaj kohe, ai interpretoi role të rëndësishme që lanë gjurmë në skenën teatrore shqiptare, si Pedagogu në “Pas provimit të dytë”, Drejtori i fermës në “Ata që duhen”, Beni në “Vdekja e një komisioneri”, Bedriu në “Dritat e skenës”, Telhai në “Besa” dhe Filipoviç në “Inspektori”, rol që shënoi edhe daljen e tij të fundit në teatër.
Në kinematografi, Fitim Makashi debutoi që në vitin 1967 me një rol episodik në filmin “Dueli i heshtur”. Më pas, ai u bë pjesë e një sërë filmash të njohur të kinemasë shqiptare, ndër të cilët “Prita”, “Njësiti gueril”, “Ndërgjegja”, “Rrugicat që kërkonin diell”, “Në fillim të verës”, “Ilegalët”, “Nga mesi i errësirës”, “Intendenti”, “Gjurmë në kaltërsi”, “Tre njerëz me guna”, “Shpella e piratëve” dhe “Vdekja e kalit”.
Me një karrierë të gjatë dhe të pasur në teatër dhe film, Fitim Makashi mbetet një figurë e rëndësishme e skenës dhe kinemasë shqiptare, duke lënë pas një trashëgimi artistike të vyer.
