Komisioni i Mbrojtjes pranë Këshillit të Lartë të Prokurorisë ka miratuar kërkesën për forcimin e masave të sigurisë për prokurorin Altin Dumani. Vendimi është marrë pas një kërkese të depozituar nga kreu i SPAK, Klodian Braho, në lidhje me rritjen e presioneve ndaj Dumanit.
Sipas burimeve zyrtare, kërkesa lidhet me ngarkesën e lartë dhe ndjeshmërinë e hetimeve të drejtuara nga Dumani, veçanërisht gjatë periudhës kur ai ka ushtruar funksionin e kryeprokurorit të Prokurorisë së Posaçme.
Në të njëjtën mbledhje, Komisioni i Mbrojtjes ka miratuar masa të shtuara sigurie edhe për disa prokurorë të tjerë të SPAK. Mes tyre është edhe Dritan Prençi, prokuror i çështjes që lidhet me hetimet ndaj zëvendëskryeministres Belinda Balluku.
Më herët, Prençi ka kërkuar vendosjen e masave të sigurisë “pezullim nga detyra” dhe “ndalim i daljes jashtë territorit të Republikës së Shqipërisë” ndaj Ballukut, çka ka rritur ndjeshëm vëmendjen publike dhe institucionale ndaj kësaj çështjeje.
Vendimi i Këshillit të Lartë të Prokurorisë vjen në një klimë të tensionuar politike dhe institucionale, ndërsa hetimet e SPAK vijojnë të përfshijnë zyrtarë të niveleve të larta shtetërore.
