Bledar Doçi
Bledar Doçi, vëllai i Elvis Doçit të njohur si “Visi i Pojës”, është arrestuar pak ditë më parë në Turqi, në kuadër të një kërkese të autoriteteve italiane. Burime për SYRI bëjnë me dije se ai akuzohet për pjesëmarrje në një grup të strukturuar kriminal të përfshirë në trafikun ndërkombëtar të lëndëve narkotike.
Sipas hetimeve, Bledar Doçi dyshohet se ka qenë pjesë e organizatës kriminale të drejtuar nga vëllai i tij, Elvis Doçi. Për këtë grup, autoritetet italiane, në bashkëpunim me Prokurorinë e Posaçme (SPAK), kanë lëshuar gjithsej 24 urdhër-arreste. Prokuroria e Breshias ka dokumentuar se gjatë periudhës 2020–2025, organizata ka trafikuar rreth 1.3 ton kokainë.
Elvis Doçi, i njohur si “Visi i Pojës”, dyshohet si një nga drejtuesit kryesorë të një organizate kriminale të trafikut ndërkombëtar të drogës me bazë në Durrës. Sipas akuzës, grupi kishte strukturë operative në Shqipëri dhe degëzime në Itali, duke trafikuar lëndë narkotike nga Amerika e Jugut përmes rrugëve tregtare, me destinacion portet kryesore të Europës Veriore.
Nozka “Visi i Pojës” lidhet me marrëdhënien familjare të Elvis Doçit me Xhevdet Troplinin, i cili është daja i tij. Ai i ka shpëtuar arrestimit gjatë operacionit të zhvilluar më 21 maj 2025 dhe vijon të jetë në arrati. Ndërkohë, autoritetet italiane kanë vendosur edhe 22 masa sigurie ndaj anëtarëve të tjerë të dyshuar të organizatës.
Sipas SPAK, hetimet kanë dokumentuar rreth 30 episode të trafikut të drogës në Itali, si dhe 10 raste të tjera në Shqipëri dhe në vende të ndryshme të Europës. Në kuadër të këtij hetimi janë përdorur edhe të dhëna të siguruara nga aplikacionet e komunikimit të enkriptuar SKY ECC.
Elvis Doçi është në kërkim që prej majit 2025, kur Prokuroria e Posaçme, në bashkëpunim me autoritetet antimafia italiane, ndërmori një operacion të gjerë kundër këtij rrjeti kriminal të dyshuar për trafikim ndërkombëtar të lëndëve narkotike në disa vende të Bashkimit Evropian.
