KLGJ
Këshilli i Lartë Gjyqësor i është drejtuar me një kërkesë zyrtare Kuvendit të Shqipërisë, Ministrisë së Brendshme dhe Policisë së Shtetit, duke kërkuar marrjen e masave urgjente për garantimin e sigurisë në të gjitha gjykatat e vendit.
Në shkresën e dërguar, KLGJ thekson domosdoshmërinë e vendosjes së punonjësve të Policisë së Shtetit me prezencë të përhershme në gjykata, si dhe hartimin e një plani të detajuar sigurie, i cili duhet të shërbejë si bazë për ristrukturimin e plotë të sistemit të sigurisë në institucionet e drejtësisë.
Po ashtu, Këshilli kërkon që gjykatat të klasifikohen si institucione të rëndësisë së veçantë, duke vënë në dukje se ky proces duhet të përfundojë brenda një kohe sa më të shkurtër.
SHKRESA E PLOTË/ Këshilli i Lartë Gjyqësor i kërkon institucioneve ndërhyrje urgjente për realizimin e këtyre masave: Vendosja e Policisë së Shtetit në të gjitha gjykatat e vendit, me prezencë të përhershme, personel të trajnuar dhe plan të dedikuar sigurie. Mbështetje buxhetore dhe përmirësim i infrastrukturës së sigurisë. Klasifikim i gjykatave si institucione të rëndësisë së veçantë.
Rishikim i kuadrit ligjor dhe nënligjor që rregullon sigurinë në gjykata, për të përcaktuar qartë kompetencat, përgjegjësitë dhe burimet financiare ndërinstitucionale. Rishikim i plotë i protokolleve të hyrjes dhe daljes në gjykata, përfshirë procedurat e kontrollit për palët, dëshmitarët dhe të pandehurit.
Këshilli i Lartë Gjyqësor u bën thirrje Kuvendit të Shqipërisë dhe Këshillit të Ministrave që, në bashkëpunim me Ministrinë e Brendshme, Ministrinë e Drejtësisë dhe Policinë e Shtetit, të hartojnë një Plan Kombëtar për Sigurinë në Gjykata, i cili të përcaktojë përgjegjësitë e secilit institucion, afatet e zbatimit, burimet financiare si dhe mekanizmat e kontrollit dhe raportimit. Ky plan duhet të përfundojë brenda një kohë sa më të shkurtër dhe të jetë bazë për ristrukturimin e plotë të sistemit të sigurisë në gjykata. Këshilli i Lartë Gjyqësor mbetet i gatshëm të bashkëpunojë ngushtë me të gjitha institucionet përkatëse dhe të kontribuojë me ekspertizën e tij në hartimin e këtij dokumenti strategjik.
