Këshilli i Ministrave të Jashtëm të Bashkimit Evropian ka arritur një marrëveshje politike për përfshirjen e Korpusit të Gardës së Revolucionit Islamik (IRGC) të Iranit në listën e organizatave terroriste të BE-së. Ky vendim shënon një ndryshim të fortë, megjithëse kryesisht simbolik, në qasjen evropiane ndaj udhëheqjes iraniane.
Përfaqësuesja e Lartë e BE-së për Politikën e Jashtme, Kaja Kallas, deklaroi se me këtë hap Garda e Revolucionit renditet në të njëjtën kategori me organizata si Shteti Islamik (Daesh), Hamasi, Hezbollah-u dhe Al-Kaeda. Ajo theksoi se shtypja e dhunshme e protestave në Iran ka pasur një kosto të rëndë njerëzore, duke nënvizuar se “ata që veprojnë përmes terrorit duhet të trajtohen si terroristë”.
E pyetur nëse Bashkimi Evropian do të mbështeste Shtetet e Bashkuara në rast të një sulmi të mundshëm ndaj Iranit, Kallas u shpreh se “rajoni nuk ka nevojë për një luftë tjetër”.
Në të njëjtën linjë, presidentja e Komisionit Evropian, Ursula von der Leyen, deklaroi se termi “terrorist” është i përshtatshëm për të përshkruar një regjim që, sipas saj, shtyp me gjakderdhje protestat e qytetarëve të vet.
Vendimi unanim i 27 vendeve anëtare e rreshton Bashkimin Evropian me shtete të tjera si Shtetet e Bashkuara, Kanadaja dhe Australia, të cilat e kanë shpallur më herët IRGC-në organizatë terroriste.
Nga ana tjetër, reagimet nga Teherani kanë qenë të ashpra. Ministri i Jashtëm iranian, Abbas Araghchi, e cilësoi vendimin e BE-së si një “gabim të madh strategjik”. Në një postim në platformën X, ai deklaroi se “disa vende po përpiqen të shmangin shpërthimin e një lufte të përgjithshme në rajon, por asnjë prej tyre nuk është evropiane”, duke akuzuar Evropën se po “ndez zjarrin”.
Edhe forcat e armatosura iraniane e dënuan vendimin, duke e cilësuar atë si “të papërgjegjshëm” dhe “dashakeq”. Në një deklaratë të transmetuar nga agjencia shtetërore IRNA, thuhet se vendimi i BE-së është marrë si pasojë e “nënshtrimit të verbër ndaj politikave të Shteteve të Bashkuara dhe regjimit sionist”, duke iu referuar Izraelit.
