Një 45-vjeçar mbeti i plagosur me armë zjarri mbrëmjen e së martës në Shijak, pas një konflikti që degjeneroi në dhunë fizike. I plagosuri është identifikuar si Denis Çumani, i cili u përfshi në një përplasje me dy kushërinjtë Dorian dhe Indrit Ferra.
Sipas burimeve nga grupi hetimor, shkaku i konfliktit lidhet me një vajzë, me të cilën Indrit Ferra ishte në një marrëdhënie. Dyshohet se Çumani i kishte dërguar asaj disa mesazhe, gjë që ka sjellë përshkallëzimin e situatës.
Një ditë më parë, vajza ishte takuar me Indrit Ferrën dhe kishin shkuar së bashku në një lokal. Gjatë kësaj kohe, asaj i kanë mbërritur sërish mesazhe nga Çumani, të cilat janë vënë re nga Ferra.
Pas shoqërimit të vajzës në banesë, Indrit Ferra ka marrë kushëririn e tij, Dorian Ferrën, dhe të dy janë drejtuar drejt banesës së Çumanit. Ky i fundit ka dalë jashtë pas thirrjeve të tyre, ku fillimisht është dhunuar fizikisht dhe më pas është qëlluar me armë zjarri.
Plumbi e ka goditur në brinjë, duke i shkaktuar plagë të rënda. Çumani ndodhet aktualisht në spital nën kujdesin e mjekëve, ndërsa Dorian dhe Indrit Ferra janë shpallur në kërkim nga policia, e cila vijon hetimet për zbardhjen e plotë të ngjarjes.
