Jepet dënimi për grupim e trafikit të narkotikëve kryesuar nga Moisi Habilaj.
Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës së Posaçme kërkesën për gjykimin e çështjes penale ndaj Moisi Habilajt, Nezar Seitit, Fatmir Minajt dhe Maridian Sulajt (alias Meridian Sulaj), të akuzuar për veprën penale të trafikimit të narkotikëve, të kryer në bashkëpunim dhe në kuadër të një grupi të strukturuar kriminal.
Gjykimi u zhvillua me procedurën e gjykimit të shkurtuar dhe në përfundim, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të përbërë nga gjyqtaret Elsa Ulliri, Rudina Palloj dhe Luljeta Kole, shpalli vendimin nr. 6, datë 23.01.2026.
Sipas vendimit, Moisi Habilaj u shpall fajtor për veprën penale të trafikimit të narkotikëve, të kryer në bashkëpunim, në formën e grupit të strukturuar kriminal, si dhe për veprën penale të “Grupit të strukturuar kriminal”, për disa episode të zhvilluara në Shqipëri dhe Itali. Në bashkim të dënimeve, ai u dënua me 15 vite burgim, dënim që për shkak të gjykimit të shkurtuar u ul me një të tretën, duke u dënuar përfundimisht me 10 vite burgim, për t’u vuajtur në një burg të sigurisë së lartë.
Edhe Nezar Seiti u shpall fajtor për veprën penale të trafikimit të narkotikëve në kuadër të grupit të strukturuar kriminal, për episode të zhvilluara në Itali, dhe u dënua fillimisht me 12 vite burgim. Pas aplikimit të uljes me një të tretën, dënimi përfundimtar ndaj tij u caktua 8 vite burgim. Akuza për “Grup të strukturuar kriminal” ndaj Seitit u pushua, pasi ai ishte dënuar më parë për të njëjtin fakt penal.
Gjykata vendosi pushimin e akuzave për veprën penale të trafikimit të narkotikëve dhe atë të “Grupit të strukturuar kriminal” ndaj Fatmir Minajt dhe Maridian Sulajt, pasi ndaj tyre kishte vendime të formës së prerë për të njëjtat fakte. Për rrjedhojë, u hoq edhe masa e sigurisë “Arrest në burg” e vendosur më herët ndaj tyre.
Po ashtu, gjykata urdhëroi konfiskimin e provave materiale, përfshirë një mjet lundrues gomone dhe pajisjet përkatëse, të cilat do të kalojnë në favor të shtetit, ndërsa shpenzimet proceduriale dhe gjyqësore do të mbulohen nga të pandehurit e shpallur fajtor.
Kundër këtij vendimi lejohet ankim në Gjykatën e Posaçme të Apelit për Korrupsionin dhe Krimin e Organizuar, brenda 15 ditëve nga komunikimi i vendimit të arsyetuar.a.b
