Ilir Beqaj
Gjykata Kushtetuese ka rrëzuar kërkesën e ish-ministrit Ilir Beqaj, duke lënë në fuqi masën e sigurisë “arrest në burg” të vendosur ndaj tij nga gjykatat e posaçme.
Sipas vendimit të shpallur sot Kushtetuesja ka vendosur rrëzimin e kërkesës së Beqajt, e depozituar në korrik të 2025, me të cilën ai kërkonte shfuqizimin si të papajtueshme me Kushtetutën të disa vendimeve gjyqësore në disa shkallë që e mbanin atë në qeli.
Kërkesa kishte si objekt shfuqizimin e vendimeve të marra nga Gjykata e Posaçme e Shkallës së Parë për Korrupsionin dhe Krimin e Organizuar më 03.07.2024 dhe 06.07.2024, si dhe të vendimit të Gjykatës së Posaçme të Apelit të datës 07.08.2024. Po ashtu, ishte kërkuar shfuqizimi i vendimit të Kolegjit Penal të Gjykatës së Lartë, të datës 14.01.2025.
Ilir Beqaj kishte kërkuar gjithashtu kthimin e çështjes për rigjykim në Gjykatën e Posaçme të Shkallës së Parë, si dhe përjashtimin nga shpenzimet gjyqësore.
Me vendimin e saj, Gjykata Kushtetuese ka rrëzuar kërkesën, duke lënë në fuqi të gjitha vendimet e mëparshme gjyqësore dhe masën e arrestit në burg për Ilir Beqajn, ndërsa shpenzimet gjyqësore mbeten në ngarkim të subjektit të interesuar. a.b
