Irena Gjoka
Gjyqtarja e Gjykatës së Posaçme, Irena Gjoka, i është drejtuar me një letër Këshillit të Lartë Gjyqësor (KLGJ), ku ka paraqitur argumentet e saj lidhur me një vendim gjyqësor të marrë nga Gjykata e Janinës.
Sipas saj, ajo nuk ka qenë asnjëherë e njoftuar, në asnjë formë, për një dënim nga autoritetet gjyqësore greke, fakt të cilin e thekson edhe në komunikimin zyrtar me KLGJ-në.
Gjoka pretendon se pikërisht për këtë arsye, në formularin e dekriminalizimit nuk ka deklaruar se është dënuar nga një gjykatë në Greqi për falsifikim vize. Ajo mohon të ketë kryer një shkelje të tillë dhe shprehet se nuk ka dijeni për ekzistencën e një vendimi penal ndaj saj. Ajo është refuzuar dy herë në kufirin grek.
Më tej, gjyqtarja shpjegon se më 24 dhjetor 2002 ka tentuar të hyjë në Greqi përmes pikës kufitare të Kakavijës, por i është ndaluar hyrja në territorin grek, pa iu dhënë një shpjegim i qartë. Sipas saj, një situatë e ngjashme është përsëritur edhe gjatë vitit 2003.
Nga të dhënat rezulton se Gjykata e Janinës e ka dënuar Gjokën me tre muaj burgim dhe 1 500 euro gjobë, ndërsa masa e burgimit është konvertuar në gjobë, me vlerë 4.4 euro për çdo ditë dënimi.
