Kryetari i Bashkisë së Tiranës, Erion Veliaj, i është drejtuar Gjykatës Administrative të Shkallës së Parë Tiranë me një padi kundër institucionit të Presidentit të Republikës së Shqipërisë dhe prokurorit Ols Dado. Përmes kësaj padie, Veliaj kërkon shpalljen e pavlefshmërisë absolute të dekretit të emërimit të Dados në detyrën e prokurorit.
Padia e Veliajt nuk ndryshon shumë prej sulmeve që ai dhe kompanitë e PR të vëllait kryen ndaj prokurorit Dade përgjatë procesit hetimor. Veliaj kërkon të zbehë personalitetin e prokurorit përgjatë procesit gjyqësor duke menduar se kjo do të lehtësojë akuzat ndaj tij dhe do ti krijojë përparësi përgjatë debatit në gjyq.
Ndërsa Veliaj ka zbrazur gjithë bateritë ndaj Dados, prokurori tjetër i çështjes Altin Dumani nuk është prekur fare nga sulmet e tij.
Sipas padisë, emërimi i Ols Dados në vitin 2008 është kryer në shkelje të hapur të ligjit, pasi ai nuk kishte përfunduar Shkollën e Magjistraturës, e cila përbënte një kriter të detyrueshëm ligjor për ushtrimin e funksionit të prokurorit. Veliaj pretendon se Dado ka kaluar drejtpërdrejt nga statusi i noterit në atë të prokurorit, pa plotësuar kushtet e përcaktuara nga legjislacioni në fuqi në atë periudhë.
Në padi thuhet se ky emërim i pretenduar si i paligjshëm ka prodhuar pasoja të rënda institucionale dhe administrative, duke ndikuar jo vetëm në funksionimin e Bashkisë së Tiranës, por edhe në interesin publik dhe rendin institucional të Republikës së Shqipërisë. Sipas kryebashkiakut, vendimmarrjet dhe veprimet e ndërmarra nga Ols Dado në cilësinë e prokurorit kanë pasur ndikim të drejtpërdrejtë në procese që lidhen me administrimin vendor. a.b
