Rama pret Ivanka Trump në Kryeministri
Kryeministri Edi Rama vijon ka bërë publik takimin e dytë me vajzën e Presidentit Trump, Ivanka Trump, e cila ndodhet në Shqipëri në vijim të planeve të biznesit në zonën e Zvërnecit në Vlorë. Një natë më parë ai darkoi bashkë me të dhe ekipin e saj në një restorant në Vlorë.
Ivanka Trump, ka mbërritur mbrëmjen e kësaj të enjtje në ambientet e Kryeministrisë, ku është pritur nga kryeministri Edi Rama.
Kryeministri Rama e ka shtrydhur deri në fund këtë vizitë për biznes të Ivanka Trump për të ndryshuar bindjen në Tiranë se Rama është figurë e papëlqyer nga Uashingtoni për shkak të pranisë së parave të narkotrafikut ndërkombëtar në ekonominë shqiptare, dyshimet për pastrim masiv parash në ndërtim e turizëm dhe dyshimet për lidhje direkte të qeverisë së Tiranës me grupe të rrezikshme të trafikut të kokainës.
Ivanka Trump nuk ka bërë asnjë deklaratë publike duke shmangur edhe postimet e zakonshme në rrjete sociale. Dy ditët e fundit faqet e saj në X, Facebook dhe Instagram nuk kanë asnjë postim nga Shqipëria, aq më pak nga takimet me Ramën.
Edhe këtë të enjte, ajo ka vijuar programin e vizitës me lëvizje nën masa të rrepta sigurie. Pasi u largua nga hoteli ku ishte akomoduar në zonën e Ujit të Ftohtë, Ivanka Trump është parë duke u drejtuar drejt vijës bregdetare të Zvërnecit.
Në këtë zonë, ajo ka zhvilluar takime të shkurtra pune, e shoqëruar gjatë gjithë kohës nga grupe arkitektësh, të cilët po asistojnë në prezantimin e projekteve të parashikuara. Vizita e saj në Shqipëri pritet të përmbyllet mbrëmjen e sotme, ndërsa të premten Ivanka Trump do të largohet nga vendi.a.b
