Elvi Roshi
Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet ndaj ish-kryebashkiakut socialist të Kavajës, Elvis Roshi, i cili akuzohet për veprën penale të “shpërdorimit të detyrës”. Roshi u paraqit këtë të martë në ambientet e SPAK, i shoqëruar nga avokati i tij mbrojtës, Andi Skënderi, ku iu komunikua zyrtarisht mbyllja e hetimeve, ndërsa çështja pritet të dërgohet për gjykim.
Hetimet ndaj ish-kryebashkiakut kanë nisur pas një kallëzimi të bërë rreth 10 vite më parë nga Kontrolli i Lartë i Shtetit (KLSH), i depozituar në shtator të vitit 2015 në Prokurorinë e Kavajës. Sipas kallëzimit, Roshi dhe 10 zyrtarë të tjerë dyshohet se kanë shkaktuar një dëm ekonomik prej rreth 33 milionë lekësh përmes procedurave të tenderimit për rikonstruksionin e qendrës së qytetit dhe ndërtimin e disa rrugëve.
Shkeljet janë konstatuar pas një auditi të kryer në Bashkinë e Kavajës për periudhën janar 2013 – dhjetor 2014. Në raportin e KLSH-së janë evidentuar 12 procedura tenderimi, kryesisht për rikonstruksionin e qendrës së qytetit, ndërtimin e rrugëve lidhëse si dhe mbjelljen e pemëve dekorative.
Në dy raste, KLSH ka konstatuar aplikim të standardeve të dyfishta në vlerësimin e ofertave, ku operatori ekonomik me ofertën më të ulët është skualifikuar. Po ashtu, për tre tenderë të tjerë, është vlerësuar se operatori me çmimin më të ulët është përjashtuar padrejtësisht si pasojë e llogaritjeve të gabuara të ofertave.
Fillimisht, çështja u trajtua nga Prokuroria e Durrësit, e cila kishte kërkuar pushimin e hetimeve, por me një vendim të marrë vitin e kaluar, Gjykata e Posaçme kundër Korrupsionit dhe Krimit të Organizuar (GJKKO) urdhëroi vijimin e hetimit nga SPAK.
