Kryetari i Partisë Demokratike, Sali Berisha, u bëri thirrje qytetarëve që më 24 janar të dalin masivisht në sheshe, duke e kthyer protestën në një mesazh të fuqishëm për demokraci dhe ndryshim. Thirrja u bë gjatë fjalës së tij në foltoren para Kryeministrisë, ku Berisha kërkoi angazhim të plotë qytetar në ditët në vijim.
Berisha theksoi se kjo javë duhet të shfrytëzohet maksimalisht për mobilizim, duke kontaktuar çdo qytetar dhe duke përhapur mesazhin e protestës në Tiranë dhe në gjithë vendin. Sipas tij, sheshet dhe rrugët e kryeqytetit duhet të shndërrohen në simbol të kundërshtimit ndaj qeverisë dhe në shprehje të vullnetit qytetar.
“Edi Rama është një narko-diktator i cili vjedh shqiptarët nga mëngjesi gjer në darkë.
Qeveritarët e tij janë shushunja të vërteta që depozitojnë pasuri përrallore nga taksat e qytetarëve dhe pasuritë publike.
Është jetike, është vendimtare t’i përmbysim këta kriminelë dhe t’i çojmë përpara ligjit.
Shqipëria nuk do ketë kurrë Kushtetutë dhe ligj pa triumfin e opozitës, pa triumfin e qytetarëve, pa kryengritjen paqësore të shqiptarëve.
Le ta bëjmë ne natën ditë këtë javë, të trokasim në çdo votër, në çdo derë, në çdo zemër në Tiranë dhe kudo.
Sheshet dhe rrugët e kryeqytetit të shndërrohen në tmerrin e regjimit, në triumfin e lirisë, në triumfin e qytetarëve.”, tha Berisha.
Kreu i PD-së e cilësoi protestën e 24 janarit si një moment kyç për opozitën dhe qytetarët, duke e konsideruar atë një hap vendimtar në betejën politike kundër qeverisë aktuale.
