Maduro me ushtarakë të tij
Një operacion dramatik amerikan ka përfunduar me kapjen e presidentit venezuelian Nicolás Maduro dhe bashkëshortes së tij në Karakas, në orët e para të mëngjesit të së shtunës. Lajmin e konfirmoi vetë presidenti Donald Trump përmes një postimi në platformën e tij Truth Social, ku shkroi:
“Shtetet e Bashkuara të Amerikës kanë kryer me sukses një operacion të gjerë kundër Venezuelës dhe liderit të saj, Nicolás Maduro, i cili së bashku me bashkëshorten e tij është kapur dhe fluturuar jashtë vendit.”
Ky zhvillim tronditës vjen pas javësh tensioni në rritje mes Uashingtonit dhe Karakasit. Sulmet e koordinuara ndaj kryeqytetit venezuelian u shoqëruan me shpërthime të forta, fluturime me avionë ushtarakë dhe ndërprerje të energjisë elektrike në disa zona.
Reagimet nga Venezuela
Ministri i Jashtëm venezuelian, Yván Gil Pinto, tha se qeveria ka kërkuar një mbledhje urgjente të Këshillit të Sigurimit të Kombeve të Bashkuara për të diskutuar “agresionin e rëndë ushtarak” ndaj vendit.
“Asnjë sulm tinëzar nuk do të mposhtë forcën e popullit tonë, që do të dalë fitimtar,” tha ai në Telegram.
Ndërkohë, nënkryetarja e Venezuelës, Delcy Rodríguez, deklaroi në një lidhje telefonike me kanalin shtetëror VTV se autoritetet “nuk kanë informacion për vendndodhjen e presidentit dhe zonjës së parë Cilia Flores,” duke kërkuar “provë të menjëhershme jete” nga administrata amerikane.
Ministri i Mbrojtjes, Vladimir Padrino López, e cilësoi sulmin si “pushtimin më të rëndë në historinë e vendit” dhe bëri thirrje për një “mobilizim të gjerë ushtarak” në mbarë Venezuelën.
Pamje nga vendi i ngjarjes
Ekipi i CNN raportoi shpërthime dhe zhurma avionësh në Karakas rreth orës 01:50 të mëngjesit me orën lokale. Video të verifikuara treguan helikopterë duke fluturuar ulët mbi qytet, shtëllunga tymi dhe zjarr në aeroportin e Higuerote-s. Disa lagje mbetën pa energji elektrike menjëherë pas sulmit.
Gazetarja Mary Mena, që raportoi nga terreni, tha se disa orë pas sulmit situata ishte qetësuar:
“Qyteti është i qetë për momentin, megjithëse ende nuk dihet fati i saktë i udhëheqësit.”
Qëndrimi i Trump dhe Shtëpisë së Bardhë
Në një intervistë të shkurtër për The New York Times, presidenti Trump e quajti operacionin “brilant” dhe falënderoi trupat amerikane për “planifikimin dhe ekzekutimin e shkëlqyer”.
Ai nuk pranoi të konfirmojë nëse kishte kërkuar autorizim nga Kongresi për sulmin, duke shtuar se do të flasë më gjerësisht për këtë në një konferencë për shtyp në rezidencën e tij në Mar-a-Lago.
Senatori republikan Mike Lee deklaroi se Sekretari i Shtetit Marco Rubio e kishte njoftuar personalisht për arrestimin e Maduros, i cili do të përballet me drejtësinë në SHBA për akuza të narkoterrorizmit dhe trafikimi ndërkombëtar kokaine.
Shpërblimi 50 milionë dollarë
Maduro për vite është akuzuar nga administratat amerikane si udhëheqës i “Kartelit të Diellit (Cartel de los Soles)”, një organizatë që SHBA e konsideron terroriste dhe të përfshirë në trafik droge.
Në vitin 2020, gjatë mandatit të parë të Trump, ndaj tij u ngritën akuza federale në Nju Jork. Shpërblimi për kapjen e tij fillimisht ishte 15 milionë dollarë, u rrit në 25 milionë gjatë fundit të administratës Biden dhe më pas në 50 milionë dollarë pasi Trump mori mandatin e dytë në vitin 2025.
Reagime nga Rusia dhe Irani
Ministria e Jashtme e Rusisë dënoi ashpër sulmin, duke e quajtur “akt agresioni të armatosur ndaj një shteti sovran”.
“Venezuela ka të drejtën të përcaktojë vetë fatin e saj pa ndërhyrje të jashtme,” thuhet në deklaratën zyrtare të Moskës.
Edhe Irani reagoi në të njëjtën linjë, duke e cilësuar sulmin si shkelje të sovranitetit dhe të Kartës së Kombeve të Bashkuara.
Pasiguri për të ardhmen e Venezuelës
Me rrëzimin dhe kapjen e Maduros, Uashingtoni ka realizuar një synim të kahershëm për t’i dhënë fund regjimit autoritar të majtë në Karakas. Por mbetet e paqartë se kush do ta zëvendësojë Maduron dhe nëse ky operacion do të ndezë valë protestash antiamerikane apo do të hapë një epokë të re politike për Venezuelën. r.b
