Kaja Kallas
Një valë reagimesh ka ardhur nga disa liderë dhe institucione europiane pas operacionit ushtarak të Shteteve të Bashkuara në Venezuelë. Zyrtarë të lartë kanë shprehur shqetësim për situatën, kanë bërë thirrje për respektimin e ligjit ndërkombëtar dhe po monitorojnë nga afër zhvillimet në terren.
Shefja e diplomacisë së Bashkimit Europian, Kaja Kallas, bëri të ditur se ka zhvilluar bisedime me Sekretarin amerikan të Shtetit, Marco Rubio, si dhe me ambasadorin e BE-së në Karakas. “BE-ja ka deklaruar vazhdimisht se (presidenti venezuelas Nicolás) Maduro nuk ka legjitimitet dhe ka mbështetur një tranzicion paqësor”, shkroi ajo në rrjetin X, duke theksuar se duhet të respektohen parimet e së drejtës ndërkombëtare dhe Karta e Kombeve të Bashkuara.
Ministri i Jashtëm i Belgjikës, Maxime Prévot, njoftoi se ambasada belge në Bogota, Kolumbi, është “plotësisht e mobilizuar” për t’iu përgjigjur situatës. Ai theksoi se zhvillimet po ndiqen nga afër, në koordinim me partnerët europianë.
Edhe ministri i Jashtëm i Holandës, David van Weel, deklaroi se situata në Karakas mbetet ende e paqartë. Ai bëri të ditur se autoritetet holandeze po e monitorojnë ngjarjen dhe janë në kontakt të vazhdueshëm me ambasadën e tyre në Venezuelë.
Nga Polonia, Ministria e Punëve të Jashtme njoftoi se po verifikon numrin e shtetasve polakë që ndodhen aktualisht në Venezuelë. Sipas një zëdhënësi, Maciej Wewiór, nuk ka informacione se ndonjë qytetar polak ka nevojë për ndihmë, ndërsa shumica e polakëve në Venezuelë jetojnë atje prej kohësh.
Kryeministri i Spanjës, Pedro Sánchez, deklaroi se qeveria e tij po ndjek nga afër zhvillimet në Venezuelë. Ai theksoi se ambasada dhe konsullatat spanjolle në vend janë funksionale dhe bëri thirrje për ulje të tensioneve dhe de-përshkallëzim të situatës.
Në një qëndrim të ashpër, presidenti i Bjellorusisë, Aleksandër Lukashenko, ka dënuar “kategorikisht” veprimet e SHBA-së në Venezuelë, sipas agjencisë shtetërore të lajmeve Belta. Edhe Ministria e Jashtme bjelloruse i cilësoi veprimet amerikane si “agresion të armatosur”, duke i konsideruar një kërcënim të drejtpërdrejtë për paqen dhe sigurinë ndërkombëtare.
