Një takim i mëparshëm Trump-Zelenksi në Vatikan
Negociatat mes Shteteve të Bashkuara të Amerikës, Rusisë dhe Ukrainës kanë hyrë në një fazë të re pas publikimit të një plani paqeje me 28 pika, i hartuar me pjesëmarrjen e drejtpërdrejtë të administratës së Donald Trump dhe përfaqësuesve rusë. Sipas burimeve nga Reuters, Axios dhe mediat kryesore, ky plan synon t’i japë fund konfliktit të zgjatur në Ukrainë duke parashikuar lëshime territoriale nga ana e Kievit në rajonet lindore. Ukraina duhet të heqë dorë nga zona e Donbasit dhe Territore të tjera që janë aktualisht nën kontrollin e trupave ruse, ndërsa në këmbim do të marrë garanci të reja sigurie nga SHBA dhe partnerët perëndimorë kundër çdo agresioni të ardhshëm nga Moska.
Drafti parashikon që reduktimi i trupave ukrainase dhe dorëzimi i armëve me rreze të gjatë veprimi të jenë pjesë thelbësore e marrëveshjes. Rusishtja dhe Kisha Ortodokse Ruse do të marrin status zyrtar në Ukrainë, ndërsa ndihma ushtarake amerikane për Kievin pritet të kufizohet në mënyrë të ndjeshme. Plani, i frymëzuar nga modeli i armëpushimit në Gaza, kërkon t’i japë fund luftimeve përmes një armëpushimi të menjëhershëm, ndërkohë që përfshirja e vendeve të Bashkimit Europian dhe Turqisë shihet si garanci shtesë për sigurinë rajonale.
Marrëveshja nuk kërkon njohjen formale të aneksimeve, por vendos kufij të rinj de facto, duke riorientuar raportet e ardhshme mes SHBA-së, Rusisë dhe Ukrainës. Zyrtarë ukrainas kanë shprehur rezerva të forta lidhur me zbatimin e planit dhe përfitimet që ofron, duke argumentuar se ai anon fort nga kërkesat maksimale të Kremlinit. Negociatat mbeten të hapura, ndërsa rajoni dhe opinioni ndërkombëtar ndjekin me vëmendje çdo zhvillim që mund të përcaktojë ekuilibrat e ardhshëm të sigurisë në Evropë. r.b
